Nongpoh, Jymmang 12 : Ka jingshoh doh ha ki Wah ha kylleng ka Jylla kala jur bha mynta ba dang rit lut ki Wah bad ba dang rkhiang ka bneng bad ki dohkha dohpnat kim lah kyrda ne shan slem na ki bih jong u bomb dynamite ne ki dawai kum u kynbat Kharu, Tutia ne Shun haduh ba bun kila shu iap kai bad per ha ki sla um.
Kum kane ka jingjia ka dang jia mynta ha Wah Khri ha ki thain Western Ri-Bhoi ha kaba wat u Kha Khla ubala heh haduh 80 Kilo ula iap na ka jingshoh da ki kynbat Kharu da ki riew rhah khlem da iakren ia kiwei ki jait dohkha khamtam ki khasaw bad khalad.
Ha ki video bala saphriang ha ki rynsan jong ki social media la iohi ia katno ka jingiap ki kha khla ha kane ka Wah na ka jingdusmon kine ki briew bad la iohi ruh ia uwei u briew uba la bah ha met ia u Kha Khla uba la antad ka jingkhia kaba kot haduh 80 Kilo.
Ka khubor na ki Pulit ka Patharkhmah Police Ourpost ka iathuhba katto katne ki briew na ki shnong ka Western Ri-Bhoi kila leit ber bih ia kane ka wah da kaba pyndonkam da u Kharu ban pyniap ia ki dohkha.
U Kharu u dei u kynja snep dieng uba pynmih ia ka dawai kaba pynbuaid bad longbih ia ki dohkha. Une u jait kynbat u dei uba ju pyndonkam bha da ki paid riewlum ka thain ha ka jingiashoh doh da ka shnong ka thaw kaba ki ong ha ka ktien nongwei ka Community Fishing.
La pyntip ruh ba ki kynhun ki Pulit kila hiar ban leit tohkit sha kane ka wah bad kila ioh kurup ia lai song u kharu, bala pyndonkam ban ai bih ia ki dohkha.
Ka jingtohkit mynta kala iaid shakhmat bad ki Pulit kila khot hajir ia ki katto katne ngut ki trai shnong ban kylli jingkylli halor kane ka jingjia.
Ka jingkylli mynta ka mih, shano ki bor Sorkar, shano ki bor Shnong, shano ki bor iada mariang kiban tehlakam ia kum kane ka jingpynjot ia ki jingthaw ba im jong ka mariang.
