Shillong, Jymmang 11 : U Nongialam ka NPP bad Symbud Myntri Rangbah ka Jylla Bah Sniawbhalang Dhar hynne ka sngi Palei, ula kyntait ia ki khubor hamsaia ba kan sa don ka jingkylla ha ka Sorkar Meghalaya Democratic Alliance (MDA)-2 hadien ka elekshon ha Sohiong.
Ka jingiathep vote ha ka elekshon MLA ha Sohiong la pynlong hynnin ka sngi Balang bad ka jingniew ia ki vote kan long ha ka 13 tarik mynta u bnai.
Hynrei, u DyCM ula ong ba ki paralok ba iatreilang ha ka Sorkar MDA-2 ki iadon ia ka jingiadei ba iajan bha bad ma u hi um iohi satia ban don ka jingkylla ha ka Sorkar hadien ka elekshon Sohiong.
Halor ka jingkam na baroh arliang mamla, u Bah Sniawbha ula ong ba baroh kine kiei kiei ki dei tang ki “Jingkren elekshon” bad kaei kaba jia ha ka por elekshon kan kut tang ha ka elekshon.
Haba kylli halor ka jingiohi jong u ia ka elekshon, u Bah Sniawbha ula ong “To ngin ap ia ka sngi niew vote” bad bynrap “Ka NPP kan kam ba ka NPP kan jop bad ka UDP ruh kan kam ba kan jop”.
