Shillong, Jymmang 10: Ha ka National Conference kaba dang shu dep halor ka mat “Land Governance in North Eastern States” kaba la long haka 3- 4 tarik u Jymmang ha Guwahati, ki Territorial bad Autonomous District Council jong ka jylla Assam, Tripura, Mizoram bad Meghalaya kila pynpaw ba ka long kaba kongsan ban pynthymmai noh bad ban pyndonkam ia ki kor digital ha ka jingbuh jingthoh ia ki kot pata bad dulir khyndew (Land Record).
Ia katei ka National Conference la pynlong da ka Lal Bahadur Shastri National Academy of Administration, Mussoorie bad Department of Land Resources ha ryngkat ka jingkyrshan jong ka tnad Revenue jong ka sorkar Assam.
U Ajay Tirkey, Secretary, Department of Land Resources ula pyniaid ia katei ka National Conference bad ha katei ka jingialang la wan ban iadonlang u Sonmoni Borah, Joint Secretary, Department of Land Resources; Gyanendra Dev Tripathi, Principal Secretary, Revenue, Government of Assam, ka Anandhi, Deputy Director, Lal Bahadur Shastri National Academy of Administration, Mussoorie, u P.V. Rajasekhar, Additional Surveyor General, Survey of India, Mridula Singh, Sr. Social Development Specialist, World Bank bad kiwei kiwei ki heh ophisar.
Nalor kane la leit ruh ban mihkhmat da ki nongmihkhmat na ka Bodoland Territorial Council, Karbi Anglong Autonomous District Council, Dima Hasao Autonomous District Council kiba don ha ka jylla Assam, Tripura Tribal Areas Autonomous Council, jong ka Tripura, ka Lai Autonomous District Council, Mizoram, ka Khasi Hills Autonomous District Council, ka Garo Hills Autonomous District Council bad ka Jaintia Hills Autonomous District Council kiba hap ha Meghalaya.
Ha katei ka National Conference la iatai sani halor ka Current State Practices & Modernization of land Records, Land Governance Assessment Framework, Customary and Indigenous Laws, Current Practices, ki sienjam kiba dei ban shim thymmai bad ka kamram jong ka Survey of India ha kaba iadei bad ka jingpynthymmai ha ka rukom buh ia ki Land Records da kaba pyndonkam ia ki kor katkum ka juk stad ba mynta.
Watla kala don ka jingpyrshang ban ha kaban pyndonkam da ki kor kompiwtar ha kaban buh ia ki rekod jong ki jaka ki puta bad ki Map kala iaid shakhmat ha ki bynta jong ka jylla Assam, hynrei la sakhi ba kila don pat katto katne ki jingdkoh ha ki thain kiba hap ha Bodoland Territorial Council, Karbi Anglong Autonomous District Council bad Dima Hasao Autonomous District Council.
La pynwandur iaka Bodoland Land Policy bad la khmih lynti ba shen yn sa lah ban pyllait paidbah noh, ka Survey & Settlement ha ki jaka kiba hap ha Karbi Anglong ym pat la leh satia, katba ka Dima Hasao Autonomous District Council kala dep ban pdiang ban pyntreikam iaka Assam Land Regulation Act bad kala don ruh ka jingdonkam ban leh iaka sorjamin ia ki jaka ki bym pat dep.
Ka Tripura Tribal Areas Autonomous Council ka don 8 tylli ki District bad kumba 10,000 sq.km ka jaka kaba hap hapoh ka Sixth Schedule bad 10 tylli ki Customary Laws.
Ha ka Lai Autonomous District Council ki jaka kiba hap ha ka Sixth Schedule, la pynpaw iaka jingdonkam ban leh biang iaka jingsorjamin ia ki jaka.
Ha ka Khasi Hills Autonomous District Council kaba bun hi ka jaka kadei kaba la longtrai da ki shnong ka thaw, katba ha Garo Hills Autonomous District Council ka don ia ka rukom treikam da kaba ai ia ki Patta man la ka snem da ka District Council, katba ka Jaintia Hills Autonomous District Council, ka bud iaka Maghalaya Land Survey and Records Preparation Act 1980.
Na ka liang ka Bodoland Territorial Council kala ai iaka jingtyrwa ban pynthymmai iaka rukom treikam da kaba pyndonkam ia ki kor ki bor ha kaban lum thup ia ki land record bad na ka liang jongka Department of Land Resources kala dep ban ai jingmynjur ia katei ka jingtyrwa.
U Secretary, Department of Land Resources ula pyntip ba ka long kaba donkam ban thaw iaka Task Force for Land Governance ha ki jylla kiba don ha ka thain shatei lam mihngi hadien ba la ioh iaka jingmynjur na ki bor kiba dei khmih bad hadien ba la dep pynlong iaka jingiasyllok bad ki District Council.
Katba u Sonmoni Borah, Joint Secretary ula kyrpad ia ki District Council ba kin phah ia ki jingtyrwa na ka bynta ban pyndonkam da ki kor ki bor ha kaban lum thup ia ki land record lyngba ka Digital India Land Records Modernization Programme(DILRMP) bad ula ai khublei iaka Anandhi, Deputy Director, LBSNAA bad Principal Secretary, Revenue, Government of Assam kaba la pynlong ia katei ka National Conference.
