Shillong, Jymmang 10 : Ka Sorkar Jylla kala buh ia ka mang tyngka haduh T. 415.93 klur ban pyndonkam ha ka jingpyntrei ia palat 17 tylli ki project kiba thmu ban kyntiew ia ka kam jngohkai pyrthei ha Jylla Meghalaya.
Haba pyntip ia kane hynne ka sngi Balang, u Myntri ka Tnad Tourism Bah Paul Lyngdoh ula ong ba hapoh ka prokram bala khot ka Meghalaya Eco Tourism Infrastructure Development, 17 tylli ki project kila don ha ki kyrdan bapher bapher jong ka jingpynkhreh.
“Ka song pisa ba kot T. 415.93 klur la dep ban mang ia kine ki project” ula ong haba iakren bad ki nongthoh khubor.
U Myntri u pyntip ba kine ki project ki kynthup ia ka Shillong Peak Ropeway, ka ban sdang pyntrei ha u bnai Naiwieng mynta u snem, ka Integrated Hospitality Convention Centre, Tura kaba dang pyntrei mynta, ka Hospitality Complex bad Tourism Infrastructure ha Mawlyndep, Sohra bad Chibagre kaba la don ha ka jingpynkreh ia ka DPR, ka jingpynkylla dur ia ka Convention Centre ha Orchid Lake Resort, Umiam bad ka Tourism Infrastructure ha Nongkhnum River Island.
“Kine kila don ha ki kyrdan bapher bapher ha ka jingiaid ki kam bad ngin don ha ka khep ban sdang noh ia ka jingkhot tender hapoh ki ar-lai bnai ban wan” ula bynrap.
U Bah Paul u pyntip ba dang shen ula leit iuhkjat ha ka Shnong Kongthong ha ryngkat bad u MDC ka thain Bah Titosstarwell Chyne uba dei u CEM ka KHADC bad pynbna ban sa tei ia ka Hospitality Complex ha kane ka Shnong. “Ngi la mang T.7.45 klur ia kane ka projecr” ula bynrap.
