Imphal, Jymmang 10 :U Nongaiktien ka Sorkar bad Myntri Sorkar Bah Paul Lyngdoh hynne ka sngi Balang ula ong ba ka Sorkar kala iai ban ba ki laingut ki shipai Border Security Force (BSF) ba donkti ha ka jingsiat iap ia u riew paidbah, ba ki dei ban shah pynshitom kat kum ka ain jong ka Ri.
Kat kum ka jingong jong u, ia ki shipai BSF dei ban khynniat sha ki khappud namar ka dei ka kam jong ki ban iada ia ka khappud na ki kam bymman bapher bapher bad ka jingprong tuh na Bangladesh sha India.
Haba iakren bad ki nongthoh khubor, u Bah Paul ula ong ba ka Sorkar kala iaroh ia ka sienjam bala shim da ka BSF ban kem ia ki laingut ki shipai jong ka, kiba siat iap ia u Bah Roning Nongkynrih ha Mawshun myn ha ka 5 tarik Jymmang.
“Ngi ia ban ba ka ain jong ka Ri ka dei ban ieng bad ba ki (shipai BSF) dei ban shah pynshitom kat kum ka kam ba kila leh namar kila jam palat pud, kaba lam sha ka jingiap u Bah Roning” ula ong.
Haba kylli, u Bah Paul ula ong ba khlem pep, katto katne ka jingburia ia ka jingduhnong ka dei ia kaban hap siew sha ki bahaiing hasem jong une u lanot haba bynrap “Ia kane ka kam yn sa pynkhreh da ka Sorkar Jylla ha ryngkat ka jingiasyllok bad ki Heh shipai BSF”.
Haba pynpaw ba ka don ka jingpynkhein ia ka SOP da ki BSF, une u Nongaiktien ka Sorkar ula ong “Kawei pat ka mat ba kongsan jong kane ka kam ka long balei ba ki BSF ki don ha ki jaka paidbah haba ki dei ban don ha ki khappud”.
“Ngi hap ban phah ia ki sha khappud. Ki dei ha ka jingshisha ban iada ia ka khappud bad ka Bangladesh. U pud u dei uba jrong bha bad ka donkam ban pahara bha namar ka jingdon bun ki kam khaii beain kiba jia bad ruh ka jingwan prong tuh kaba lah ban pynkylla ia ka tarajur ha ka jingdon ki Jaidbynriew ka Meghalaya” ula bynrap.
