Shillong, Jymmang 10 : Ka Meghalaya Agriculture Students’ Association (MeASA) kala pynpaw ia ka jingsngewnguh ia ka Sorkar Meghalaya, Indian Army, Ophisar ka Meghalaya, Manipur, Kmie Kpa, ki bor College, ka Tnad Transport bad baroh kiba don bynta ha ka jingleit shaw bad pynpoi suk ia baroh ki samla pule na Imphal.
Ha ka shithi ai jingiaroh, ka MeASA kala ai khublei ia u Myntri Rangbah ka Jylla Conrad K Sangma, Myntri ka I&PR Kong Ampareen Lyngdoh, Myntri ka Tnad Pule Rakkam A Sangma, Myntri PHE Marcuise N Marak, Subir Marak, SP Tura, DIG Shilong bad baroh kiba iarap ha ka por ba jynjar bha, ba wanrah ia ka jingjop ha kane ka jingleit shaw ia baroh ki samla pule.
“Ngi da iaroh ia ka kam ba bha ba phi la leh na ka bynta jong ngi bad ngin iai kynmaw junom ia ka” ong u Joyshelman D Sangma, President ka MeASA, COA, CAU Imphal ha ka shithi.
Lah ban pynkynaw ba namar ka jingpur ka jingkulmar bad jingia umsnam na ka jingiakynad jaidbynirew ha Manipur, ki samla pule na Meghalaya kiba don ha Manipur kila sahkut bad hap set slung ialade ha ki hostel.
Haba iohi ia ka jinglong jingman ba kala nang sniew nang sniew, ka Sorkar Meghalaya mar mar kala shim ia ka sienjam ban leit saw noh ia la ki jong ki samla pule bad ki nongshongshnong na katei ka Jylla.
Ha ka jingleit shaw kaba neh 5 sngi lynter, ka Sorkar kala lah ban wan ialam noh haduh 242 ngut ki samla pule bad ki nongshongshnong na Manipur.
