Shillong, Jymmang 10 : Ka Elekshon jied MLA jong ka Sohiong Constituency, East Khasi Hills kala sdang ha ka por 7 baje mynstep hynne ka sngi Balang bad ka jingpoi jong ki nongthep vote kat haduh ka por 11 baje mynstep kala kot ia ka 43.6 percent.
Kane ka jingiathep vote kan kut ha ka por 4 baje janmiet. Haduh 34,783 ngut ki nongthep vote ba kynthup ia 17,096 ngut ki shynrang bad 17687 ngut ki kynthei kin iathep ia ki vote jong ki ha ki 63 tylli ki polling station, ban jied ia u Nongmihkhmat sha ka Iingdorbar Thaw Ain ka Jylla.
Ia ka elekshon MLA ha Sohiong la pynkynriah shadien hadien ka jingkhlad noh jong u Myntri kam Pohiing barim ka Jylla bad kyrtong ka UDP Bah HDR Lyngdoh ha ka 20 tarik Rymphang. Ka elekshon MLA kala long ha ka 27 tarik Rymphang ha baroh kawei ka Jylla.
Haduh 5 pyrton ki CAPF kila pahara ha kane ka elekshon ha Shillong ban pynthikna ia ka jingiaid beit iaid ryntih. Ka Tnad Election kala pyndonkam ruh ia ki women flying squadha ka sien ba nyngkong eh nalor ka ka polling station tang jong ki kynthei.
Ban kham pynpher ia kane ka elekshon, ki nongthep vote jong ka model polling station ha Nongpathaw, kila iashimnbynta ruh ha ka jingiathung tynrai dieng hadien ba kila dep ban thep vote.
Ki kyrtong kiba don hakhmat eh ha ka jingiakhun ki dei u kyrtong ka National People’s Party (NPP) bad MLA barim Bah Samlin Malngiang, u kyrtong ka UDP Synshar Kupar Roy Lyngdoh bad kyrtong ka INC Bah S Osborne Kharjana.
Ka jingianiew ia ki vote kan long ha ka 13 tarik Jymmang ha State Central Library.
