-->

Shongthait ka kong Ida Nongrang kum ka DGP | Ieh shadien ia ki matti treikam bad jingaiti lut

Date:

Share post:

Shillong, Naiwieng 19 : Kawei ka bynta jong ka histori ka Tnad Meghalaya Police kala kut noh ha ka sngi Palei, da ka jingshongthait noh ka ong Idashisha Nongrang kum ka kynthei ba nyngkong eh ban long ka Director General of Police(DGP) hadien ba kot ia ka rta shongthait.

Ka 1st MLP Battalion ha Mawiong kala pynlong ia ka parade aikhublei shongthait ia kane ka Heh Pulit, ha kaba ki Ophisar kila ialum lang ban ai khublei ia kane ka Ophisar kaba la shakri la palat 30 snem.

Ha ka jingkren khatduh jong ka, ka Kong Idashisha kala phaidien sha ka jingiaid lynti kaba la sdang ha u bnai Rymphang 1993.

“Da palat 30 snem ha ka jingshakri, ka long da ka jingsngew bym lah ban batai ba nga ieng hangne ha kane ka sngi ba khatduh jong ka jingshakri jong nga” kala ong haba pynkynmaw ia ka khyllipmat ka jingshimrai, haba u Kpa jong ka, ula kyntu ia ka ban long bala thikna ha kaban ieh noh ia ka kam ba ka trei ban rung sha ka kam Pulit.

“Ha katei ka por, I Pa jong nga ila ong ‘Phi dei ban long bala thikna ba kane ka dei kaba phi kwah’, namar Nga la don lypa ha ka kam” kala ong bad bynrap ba ka por, kala jubab ia kane ka jingkylli.

Ka kong Ida kala batai ba ka jingshakri ha ka kam Pulit ka la pynlong ïa ka ban san ha ka jinglong briew bad ha ka kam.

“Kane ka jingshakri ka la ai ïa nga bun ki lad, ym tang ban san, hynrei ban noh synniang ruh katba lah na ka bynta ka bha ka miat jong ki paidbah,” ka la ong.

Ka la ong ba ka nongrim kaba la ïalam ïa ka ha ka jingshakri ka long kaba suk bha— ban shakri ha ka rukom ba kan nym babe dalei lei ruh.

Ka la ai jingïaroh ïa ki jingai jingmut kiba ka la ïoh ha ki por mynshwa, kaba la pynwandur ïa ka rukom treikam jong ka ban long kum ka nongïalam.

“Uwei u senior uba la rangbah u la ong ïa nga, ‘khein ïa ki junior jong phi kumba phi kwah ba ki senior kin khein ïa phi.’ Kane ka la long ka motto jong nga bad ka nongrim kaba nga la pyrshang ban pyndep ïa ki kam jong nga,” ka la ong.

Haba ai burom ïa ka Tnad, ka kong Ida ka la pynpaw ïa ka jingsarong halor ka jinglah jong ka Meghalaya Police ban tehlakam ïa ki kam kaikhlaw khlem da donkam ia ki jingiarap ba na shabar.

“Nga sngew sarong shibun ïa ka Meghalaya Police. Ka dei kawei na ki ar tylli ki kynhun pulit ha ka ri kiba la lah ban ïakhun ïa ki kam kaikhlaw da ka bor jong ki hi,” ka la ong.
Ka la kynmaw ruh ïa kiba la duh noh ïa la ka jingim ha ka jingiakhun kaikhlaw.

“Ngi la don palat 120 ngut kiba la kyllon ïap ha ka jingiakhun kaikhlaw, bad dei lyngba ki jingnoh synniang bad ki jingaiti jong ki ba ngi lah ban ong mynta ba ngi long kiba sngew sarong ban long ki dkhot jong ka longïing ka Tnad Meghalaya Police,” ka la ong.

Ha kaba pynkut ïa ka jingkren, ka kong Ida ka la ai khublei ïa baroh ki pulit kiba la ïeng skhem ban pynneh ïa ka motto jong ka tnad bad kiba la ai jingïarap ïa ka ha ka jingshakri.

Share post:

-->
spot_img

Popular

More like this
Related

Kurup ki Pulit haduh 380 tylli ki kuli MMG na ki tin umphniang na khlaw EGH

Shillong, Naiwieng 19 : Ki Pulit ka East Garo...

Aiti ka Sorkar Jylla ia ka Baljek Airport sha ka AAI | Plie lynti ia ka jingdon ki liengsuin na Tura

Shillong, Naiwieng 19 : Ka Sorkar Jylla bad ka...

“Khlem leh politics, hynrei dawa iala ka hok” : Synniang ki nonghikai deficit mar T.1 sha u DyCM

Rai ban pynbteng beit ia ka jingsangeh treikam Shillong, Naiwieng...