Shillong, Naiwieng 19 : Ki Pulit ka East Garo Hills kila lap bad kurup haduh 380 tylli ki kuli Medium Machine Gun (MMG) bym pat pyndonkam, bala buhrieh ha ka jaka khlaw ka shnong Rapdikgre, kaba hap hapoh ka Williamnagar Police Station.
Ka kyrwoh bala pyllait da u Superintendent of Police ka East Garo Hills Pawar Swapnil Vasantrao ha ka sngi Palei, ka iathuh ba ia kane ka jingkurup la lah ban leh da ka jingioh pdiang ia ka jingtip ba thikna ha ka 18 tari Naiwieng, halor ka jingdon shibun bah ki kuli bala buhrieh da ki briew bym lah ban ithuh ha kane ka khlaw ha shnong Rapdikgre.
“Haba shimkhia ia ki khubor ba ioh, ki Pulit kila pynlong ia ka jingkhynra ha katei ka thain,bad kila lap ia 380 tylli ki kuli MMG bym pat pyndonkam bad la kurup noh ia ki” ula ong.
Ki Pulit ki iathuh ba ia kine ki kuli la buhrieh ha ki 5 tylli ki tin umphniang bam, ia kaba la suba jur bala buhrieh da ki briew ki bym lah satia ban tip.
Halor kane ka jingioh kurup, ki pulit kila register ia ka ejahar hapoh ka Williamnagar PS Case No. 40/2026, hapoh ka kyndon 25(1A)(1B) jong ka Arms Act, khnang ban lah pynlong ia ka jingtohkit kaba bniah halor kane ka kam bad ban lapdien ia kiei kiei baroh ha lyndet kane ka jingbuhrieh ia kine ki kuli.
Ki Pulit kila kyrpad ia ki paidbah ba kin iai long kiba peit pyrman bad pyntip mar mar ia kino kino ki jingtip kiba donkam haba iadei bad ka jingdon ne buhrieh ia ki tiar siat ne kuli lane kino kino ki kam ba ishankhmat sha ki Police Station ba marjan.

