Guwahati, Jymmang 09 : U Myntri Rangbah ka Jylla Assam Himanta Biswa Sarma hynne ka sngi Ba-ar, ula pynpaw ba ka Sorkar Jylla kala pyrshang kat kaba lah ban lah weng noh pura ia ka jingtreikam ka Armed Forces Special Powers Act (AFSPA) napoh ka Jylla.
Haba iakren bad ki nongthoh khubor, u Himanta Biswa ula ong “Ka jingpyrshang kala iaid ban weng noh pura ia ka AFSPA na Assam. Ka thong jong ngi ka long ban wanrah noh ia ka jingshong shngain ha baroh ki 5 tylli ki District ka Assam, kiba la shah pynbna kum ki “disturbed area”.
Ka Sorkar Assam kala pyniar ia ka jingtreikam ka AFSPA ha ki phra tylli ki District ka Jylla haduh hynriew bnai kaba sdang treikam naduh ka 1 tarik u Iaiong.
Kat kum ka jingpynbna, ka jingithuh “disturbed area” la dep ban weng na Lakhipur Sub Division ka Cachar District.
U Myntri kam Pohiing ka Ri Amit Shah dang shen ula pynbna ban weng noh ia ka AFSPA na ki katto katne ki district ka Assam, Nagaland bad Manipur.
“Ka Sorkar India kala rai ban pynduna noh ia ka jingdon ki disturbed area hapoh ka AFSPA jong ka Jylla Nagalang, Assam bad Manipur hadien bun phew snem” ong u Amit Shah.
