Guwahati, Jymmang 9: U Myntri ka Sorkar Pdeng ba khmih ia ki Ports, Shipping & Waterways bad Ayush, Sarbananda Sonowal ula pyntip ba ka thain Shatei Lam Mihngi ka Ri India, kala pynkhreh ban long ka khyrdop jong ka Ri India sha ki Ri ka South East Asia.
U Sonowal ula pynpaw ia kane hadien ka jingleit jurip ia ka Sittwe Port kaba don ha Rakhine, Myanmar hynne ka sngi Ba-ar. Ia kane ka port la plie lang da u Sononal ha ryngkat bad u Symbud Myntri Rangbah Duh & Myntri ka Transport & Communication ka Sorkar Myanmar haba pdiang ia ka jhad kit mar ba nyngkong eh na Ri India ha kane ka port.
Haba kren ha ka jingialang, u Sonowal ula ong “Mynta ka sngi ka dei ka sngi sah jingkynmaw ia ka Ri India bad ka Myanmar katba ngi dang pynkhlain ia ka jingiadei bad ka jingiatreilang ha ka khaii ka pateng bad ka jingiakiew lang da ka jingsdang treikam jong ka Sittwe port”.
Ula ong ba kane ka port kan plie lynti ia ka khaii ka pateng kaba heh bha hapdeng ka Ri India bad ka Myanmar khamtam hapdeng ki Jylla ka thain Shatei Lam Mihngi bad ka Jylla Rakhine jong ka Myanmar.
“Hapoh ka jingialam jong u Myntri Rangbah Duh Narendra Modi, ka jingtrei hapoh ka Sittwe port kala sted bha namar ngi la iai bteng hapoh ka jingialam u Modi ban nang aibor bad plie lad plie lynti ia ka thain Shatei Lam Mihngi ka Ri India. Nga shim ia ka kabu ban ai khublei ia u Admiral Tin Aung San bad ka Sorkar Myanmar katba ngi nang pynkhlain ia ka jing iadei jong ngi da ka jingsdang treikam ka Sittwe port” ula ong.
“Nga ngeit skhem ba ka Sittwe port kan dei ka khyrdop jong ka India sha ki ri ka Southeast Asia, ka ban wanrah ia ka jingkiew shaphrang ka Ri” ula bynrap.
Ia ka Sittwe port la tei pynbha kum shibynta jong ka Kaladan Multimodal Transit Transport Project (KMTTP) bala bei tyngka hapoh ka grant in aid assistance na ka Sorkar India.
Hadien ka jingtreikam pura jong kane ka port, kan sa pyniasoh ia ka East Coast ka Ri India sha ki Jylla ka thain Shatei Lam Mihngi bad pynduna shi katdei eh ia ka jinglut bad ka por ha ka leit ka wan bad kan dei ruh ka lynti iaid jong ka Thain Shatei Lam Mihngi sha ki duriaw jong ki ri ka pyrthei.
