Shillong, Jymmang 09 : Ka South West Garo Hills bad ka East Garo Hills kila wan hakhmat eh ha ka jingdon bun tam ki samla kiba pass ia ka eksam HSSLC ka MBoSE ha ka lain pule saian bad commerce, kaba la pynbna result hynne ka sngi Ba-ar.
Ka South Garo Hills kala wan hakhmat eh ha ka jingdon kiba pass ha ka saian kaba kot haduh 90% katba ka East Garo Hills kala wan hakhmat ha ka commerce kaba kot haduh 95.71% bud s aka East Jaintia Hills-93.33% bad ka North Garo Hills ka dei kaba duna eh kaba kot tang 42 %.
Kat kum ka result bala pynbna, ka jingdon jong ki samla ba pass ha ka lain pule saian mynta u snem ka long 74.84% katba ha ka commerce ka long 79.31%.
Ha ka lain saian, hadien ka South West Garo Hills la bud da ka West Khasi Hills kaba la kot 85.4 % ha ka jingdon kiba pass bad kaba duna eh ka dei ka East Jaintia Hills District kaba kot 51%.
Haba phai pat sha ka jingpass bha shimet, ka Laban Bengalee Boy’s Higher Secondsry School, Shillong kala ioh bat ia ka top position ha baroh kine ki artylli ki lain pule jong ka saian bad commerce.
U Arnab Dutta ula ioh bat ia ka first position ha ka lain saian da ka jingioh haduh 483 mark katba u Rishab Purkayastha ula ioh ia ka first position ha ka lain commerce da ka jingioh 484 mark. Kine baroh ki dei na Laban Bengalee Boy’s Higher Secondary School.
Ia ka second position ha ka lain saian la ioh da I samla Steffi Niza W Snaitang jong ka St Edmund’s Higher Secondary School, Shillong bad ka third position da ka Eshita Bhattacharjee jong ka St Anthony’s Higher Secondary School, Shillong.
Ia ka second position ha ka lain commerce la ioh da u Akshat Poddar jong ka St Anthony’s Higher Secondary School bad ka third position la ioh da ka Satakshi Das bad Senha Paul kiba dei na St Anthony’s Higher Secondary School.
Kiwei pat ki samla pule kiba paw kyrteng ha ka thup Top 10 jong ka lain saian ki dei u Subam Das jong ka Laban Bengalee Boys’ Hr Sec School (4th), Soumitra Jha jong ka St Anthony’s (5th), Rahul Das jong ka RK Mission Hr Sec School (6th), Sargam Datta bad Sharmin Khongsit jong ka St Anthony’s (7th), Sangam Paul jong ka St Anthony’s (8th), Biswadeep Nath jong ka St Anthony’s (9th) bad Samjanai Synnah jong ka St Anthony’s (10th).
Ki Top 10 ha ka commerce pat ki dei u Akshat Das ka Laban Bengalee Boys Hr Sec School (4th), Deepak Sethia ka St Anthony’s (5th), Nengneiching ka St Anthony’s (6th), Phibalamti Marwein ka St Anthony’s (7th), Nangkhraw Laloo jong ka Mawsynram Border Area Hr Sec School, Mawsynram (8th), Kashish Sharma jong ka St Anthony’s, Eleazer Lytep jong ka St Edmund’s bad Rakhi Kumari jong ka Alpha English Hr Secondary School, Nongpoh (9th) bad Daiairi Nongrem jong ka Anderson Hr Secondary School, Upper New Nongstoin (10th).
Haba ai khublei ia ki samla pule, u Myntri Rangbah Conrad K Sangma ula thoh ha twitter “Khublei ia baroh kiba wan shakhmat duh bad baroh ki samla kiba pass ha ka eksam HSSLC (science bad commerce). Ai ba kane ka jingjop jong phi kan nang ai mynsiem ba phi nang ioh shuh shuh ia ki jingjop ha ki snem ban wan. U Blei un kyrkhu ia phi”.
Congratulations to our toppers and all our meritorious students who passed the #HSSLC (Science & Commerce) examinations. May this remarkable achievement motivate them to find more success in the future. God bless. pic.twitter.com/KSICiv9sR9
— Conrad K Sangma (@SangmaConrad) May 9, 2023
