Kohima, Jymmang 07 : Ka Assam Rifles na Kohima, Nagaland kala sdang mynta da ka ‘Operation Kohima Calling’ naduh hynnin ka sngi saitjain ban leit iarap ia ki nongshongshnong ka Nagaland kiba sahkut ha Manipur kaba don hapdeng ka jingkulmar bad jingiaumsnam.
Ia kane ka Operation la ialam da u Deputy Inspector General ka IGAR (North) bad ki don haduh 80 ngut ki shipai ha ka kynhun. Kane ka kynhun kala iatreilang bad ka Sorkar Nagaland lem bad ki Pulit ka Nagaland ban ai jingiarap ia ki nong Nagaland kiba sahkut ha Manipur ba kin ioh leit phai noh shala ka jong ka Jylla.
Kat kum ka jingpyntip u Nongaiktien ki shipai, kane ka Kynhun kala poi ha Imphal ha ka 6 tarik Jymmang bad kala sdang ia ka jingpynmih ia ki briew hynne ka step 7 tarik na RIIMS, Central Agricultural University, Manipur University bad kiba bun ki jaka ka Imphal.
“Ka kynhun kala lah ban shaw haduh 676 ngut ki briew ba kynthup ia 341 tylli ki Longiing ha kane ka Operation hynne ka sngi” ula pyntip.
Kine ki briew bad ki shipai kila wan poi ha Kohima hynne ka janmiet por 1 baje bad la pdiang ia ki da u Symbud Myntri Rangbah ka Jylla Y Patton bad kiwei kiwei ki Ophisar. Ki Kmie Kpa ruh kila wan ban pdiang iala ki jong ki Khun na ka jaka bala buh ia ki.
U Symbud Myntri Rangbah ula pynbna ban ai jingiarap ba mar T. 5000 sha kawei ka Longiing kaba mih na Manipur.
Ula ai ruh ia ka jingiaroh ia ki shipai Assam Rifles bad ki Pulit ka Jylla halor kane ka jingshimkhia. Ula pyntip ruh ba ia kiba bun ki briew ba dang sahkut ha Manipur, yn sa leit shaw noh shen.
U DGP ka Nagaland bad IGAR (North) ruh ula ai jingkren ha kane ka jingialang bad ai ia ka jingbatai kaba bniah halor ka ‘Operation Kohima Calling’.
Ka Angami Public Organisation bad Angami Youth Organisation, kila ai ka jingiaroh ia ka sorkar Nagaland bad ia ki shipai Assam Rifles halor ka jingjop jong kane ka Operation bad duwai ia ka bha ka miat jong baroh.
Ha kajuh ka por, ka Sorkar Jylla kala nang phah ia hynriew tylli ki bos sha Dimapur ban phah shuh shuh ia ki briew ban leit iarap sha Manipur.
