Shillong, Jymmang 07: Hadien ka jingioh ia ki jingtip kiba thikna, ki shipai BSF ha ka sngi Saitjain kila iohkem ia ki 13 ngut ki nong Bangladesh kiba la wan rung be-aiñ shapoh ka ri India lyngba ka khappud kaba don ha East Khasi Hills.
Ki shipai kila kem ruh ia 3 ngut ki nong India kiba na West Garo Hill kiba la donkti ha kaban iarap ia kitei ki nong Bangla ban wan rung be-aiñ shapoh ri India.
Ki BSF kila pyntip ba kila ioh kem ia kitei ki nong Bangladesh ha ka por ba ki dang mih naka khlaw kaba don hajan ka IB bad shong ha kawei ka Tata Sumo kaba la pynieng lypa ha katei ka jaka.
La iathuh, ba kitei ki nong Bangladesh ha ka jingtohkit kila phla ba kila rung shapoh ri India da ka jingthmu ban leit shapoh Kashmir ban kamai jakpoh da kaba shu bylla sngi ne ban trei ia ki kam barit baria.
Ki BSF kila aiti noh ia kitei kiba la shah kem ha ki pulit jong ka Dangar Police Station, East Khasi Hill na ka bynta ban leh ia kaba donkam.
