Shillong, Jymmang 04 : Ka jingia umsnam pher jaidbynriew hapdeng ki riewlum ka Jylla Manipur kaba dang rhem bha mynta, kala wan poi ha Nongbah Shillong hynne ka sngi Palei ha ka thain Nongrim Hills.
Kat kum ka jingiathuh u Superintendent of Police ka East Khasi Hills Bah S Nongtnger, kane ka jingkulmar hapdeng ki Jaidbynriew riewlum ki Kuki bad ki Meitei ha Nongbah Shillong kala jia ha ka por 5: 30 baje janmiet hajan ka skul Mizo Modern School.
U Bah Nongtnger u pyntip ba ha kane ka jingjia, arngut ki briew na kawei ka Jaidbynriew kila shah shoh ha kawei ka kynhun jong kiwei pat ki Jaidbynriew.
U iathuh ba ki Pulit ka Laitumkhrah Police Station haba ioh jingtip ia kane ka jingjia, kila leit wut wut sha katei ka jaka bad kila shem ia kane ka jingjiabad kila kem ia 16 ngut ki briew ban tehlakam ia ka jingkulmar.
U iathuh ba ia kine ki briew na baroh ar jaidbynriew la kem hapoh ka kyndon 107 CrPC namar ka jingpynkulmar shnong.
Ha kajuh ka por, une u Heh Pulit u pyntip ba ki Pulit ka District ula maham ban shim ia ka sienjam ba tyngeh pyrshah ia kito ki briew kiba kwah ban pynthut ia ka jingshongsuk hapoh ka Nongbah.
