Shillong, Jymmang 04 : U Myntri Rangbah ka Jylla Conrad K Sangma, hynne ka sngi Palei ula pynpaw ia ka jingsngewkhia halor ka jingjia iaumsnam kiba jia ha Manipur bad kyntu ia baroh ki Nongshongshnong ban pynneh ia ka jingshongsuk shongsain.
U Conrad ula kyntu ruh ia baroh ki liang mamla ba kin pyrshang ha kaban iapynbeit noh ia ki jingiapher jingmut da ka lynti kaba jai jai haba kyrpad ruh ia baroh ban kiar ha ka ban ktah bad pynmong ia ka jingsngew niam.
Ha ka khubor lyngba ka video, u Myntri Rangbah ka Jylla ula ong “Ka jingjia ba jia ha ka Jylla Manipur ka dei kaba pynkhuslai bad ha kum kane ka por, nga kyrpad ia baroh ki nongshongshnong ka Jylla Manipur, ia baroh ki para shynrang bad kynthei hangtei, ba ngin pynneh ia ka jingshongsuk shongsain hangtei..ngim dei ban shim ia ka lynti iaumsnam”.
“Nga kwah ban kyrpad ia ka jingsuk bad nga kwah ruh ban kyrpad ba kino kino ki jingeh kiba lah ban don,ngi dei ban pyrshang bad pynbeit iakine da ka lynti kaba jai jai. Nga kwah ruh ban kyrpad ba ngim dei ban leh ia kano kano ka kam ban pynmong ia ka jingsngew niam. Kila don ki jingthombor ia ki Niam bapher bapher ha ka Jylla”.
U Conrad ula ong “Ka jingthombor ia ki Balang bad ki Jaka mane Blei, kine ki dei ki kam ki bym iahap ia ka imlang sahlang jong ngi bad kine kin nang pyneh shuh shuh ia ka kam…Namar kata, nga kyrpad ba ngi dei ban kiar na kum kine ki jaka bad kwah ruh ban kyrpad sa shisien ia baroh ki paralok bad barok ki para shynrang bad kynthei ha Manipur ba ngi dei ban pyrshang ha kaban pynthikna ba ka jingsuk kan wan noh bad ban pynbeit ia kiei kiei baroh da ka lynti kaba jai jai”.
