Nongpoh, Jymmang 02 : Ka Khasi Student Union – North Khasi Hills District, kala dawa ba dei ban tohkit bniah halor ka jingiap jong ka samla Walinda Binong hapoh ka kamra Hostel ka Modi University, Rajasthan namar ka jingsuba ba ka lah ban don kaei re kaei ha lyndet ka jingiap kane ka samla.
“Ka KSU-NKH kan sa phah da ka jingthoh sha u Myntri Rangbah Duh ka Ri Narendra Modi bad u Myntri kam Pohiing Amit Shah ban dawa tohkit bniah ia kane ka jingjia khnang ban lap ia ki daw tynrai bad ka jingbishar kaba hok halor ka jingkhlad ka samla Walinda” ong u samla Ferdinald Kharkamni, President ka KSU-NKH.
Kane ka rai jong ka KSU-NKH kala mih ruh hadien ka jingiakren bad u Kpa kane ka Samla lyngba ka Telephone, uba la pynpaw ia ka jingsngewkhia kaba jur halor katei ka jingjia ka bym poi pyrkhat ia ka Longiing jong u, ban duh noh iala ka jong ka Khun ka baieid ba thoin da ka jingkhmih lynti ba kan ioh ia ka jingnang jingstad ha katei ka jaka pule.
Haba pynpaw ia ka jingsngewsih bad jingsngewkhia kaba jur halor kane ka jingjia, ka KSU kala iathuh ba kala pyrshang ban buddien ia ka jingkhlad katei ka samla lyngba u Kpa bad ong baka jingsuba shah pyniap kala paw na ka jingiathuh u Kpa uba la pyntip ba kat kum ka kaiphod post mortem, la shem ia ki dak mong ha ryndang, ka jinglait jong ki shyieng kti bad ki dak jngem ha ka kjat jong ka.
“Ka seng ka dawa jur ba dei ba tohkit bniah ia kane ka jingjia ban lap ia ka daw tynrai bad khamtam ei ban pynioh ia ka jingbishar kaba hok” kala ong haba aikhublei bad sngewnguh ia ka KSU Delhi Unit kaba la shimkhia ban synran ia ka iing ka sem jong kane ka samla ha ka por ba ki leit shaw ia ka met ban wanrah sha Jylla.
