Shillong, Jymmang 02: U Myntri Rangbah ka jylla Conrad K Sangma ula iathuh ba shen kin sa rai ia ka tarik ban shong ia ka jingialang iapynbeit pud jong ka wat ka ba-ar bad ka jylla Assam.
“Nga lah iakren lyngba ka phone bad ki briew na ka sorkar Assam. Ngi dang pynkhreh ha ka ban buh ia ka tarik bad nga kyrmen skhem ba ngin lah ban sdang noh ia ka jingiakren kaba nyngkong hapoh u bnai Jymmang hi” ong u Conrad Sangma haba iakren bad ki nongthoh khubor.
“Kadei ka kam kaba hap ban iaid shakhamt bad ngin ym lah ban khmih lynti ba yn lah ban pyndep lut hapoh ka shi sngi, hynrei ngin pyrshang pat katba lah” ong u Myntri Rangbah bad ka bynrap ba shen ki Myntri Rangbah jong ki ar Jylla kin sa ia pynbeit ia ka tarik ban iakynduh.
“Kaba sngewtynnad eh ka long ba ngi iai iakren, kumta shen, ngin sa lah ban buh noh ia ka tarik. Ngi la ai haduh 2 ne 3 tylli ki lad iwei ia iwei pat. Shisien ba ngi la dep ban pynbeit ia ka tarik ngin sa pyntip lang ia phi baroh” ula ong.
Ha ka 24 tarik u Lber, ka sorkar jylla kala thaw ia ki 3 tylli ki Regional Committees ba kin khmih bniah ia ka jinglong jingman jong ki 6 tylli ki jaka kiba don hapdeng ka jingkajia pud bad ban aiti iaka kaiphod hapoh 45 sngi.
Kitei ki 6 tylli ki jaka kiba don hapdeng ka jingkajia pud ki kynthup ia ka shnong Langpih ha West Khasi Hills District, ka Borduar, Nongwah-Mawtamur, Deshdoomreah, Block-II kiba don ha Ri Bhoi District bad ka Block- I, Psiar – Khanduli kiba don ha West Jaintia Hills District.
