Imphal, Iaiong 29: Ka jingiakynad ka la khie biang hapdeng ki nongiakhih pyrshah bad ki bor pulit hapoh ka sor rit Churachandpur ka Manipur hynnin ka miet sngi Thohdieng kaba la pynlong ia ki bor pulit ba kin hap ban pyndonkam da u dieng lathi bad ki lyer pynsat khmat nalor ki kuli jri ban pynpra ia u paidbah.
Ki khubor ki la saphriang ruh ha kaba iadei bad ka jingshah pyniap bad jingmynsaw jong kiba bun ngut ki briew na ka jingleh jong ki bor pulit ha Churachandpur.
Ia ka jingkhang dam kaba phra kynta hynnin ka sngi Thohdieng la khot pynlong ban pynpaw pyrshah ia ka jingshah kyndang jong ki nongshong shnong kiba dei ki Kuki na ki jaka khlaw sorkar ka la pynthut ia ka jinglong jingman hapoh ka thain shathie ka district ka Manipur kaba bun ki nongshong shnong kiba dei ki trai shnong riewlum.
Na ka liang ki bor pulit ki la hap ban pyndonkam da ki lyer pynsat khmat ban pynpraw u paidbah kiba la ialum lang ha New Lamka bad kiba la ther maw pyrshah ia ki bor pahara kiba la pynap da ka sorkar hapoh kane ka sor rit.
Kham hashwa ka la mih ka jingiakynduh hapdeng ki nongiakhih pyrshah bad ki bor pulit hapoh Sadbhavna Mandap ha New Lamka, ka jaka kaba u Myntri Rangbah (CM) Biren Singh u dei ia ka ban wan aijingkren ha ka jingialang paidbah.
Ha kawei pat ka bynta, na ka liang ki bor pyniaid district ki la pynjari da ki kyndon Section 144 of CrPC bad la khang ruh ia ka jingpyndonkam internet hapoh Churachandpur district.
Ha ka hukum ba la pynmih da ka tnat kam pohiing la ong; “Ban khanglad halor kano kano ka jingpynthut ia ka shongsuk shongsain, la khang mardor ia ka jingpyndonkam internet na ka bynta kine ki san sngi ki ban wan hapoh Churachandpur bad Pherzawl district.”
