Shillong, Iaiong 28: U Myntri Rangbah ka jylla u Conrad K. Sangma hynne ka sngi Thohdieng ula leit ban ai jingkren ha ka National Seminar halor ka phang “Representation of Women of North East India in Multi – Disciplinary Discourse” kaba la long ha Don Bosco College, Tura.
Ha katei ka seminar la wan ban iashimbynta da ki riewshemphang na kylleng ki bynta jong ka ri bad kila ai ruh ia ki jingthoh kiba kila pynkhreh kyrpang bad ha kane ka jingialang la iadonlang ruh u Myntri ka pule puthi u Rakkam A Sangma bad u Prof Sukalpa Bhattacharjee jongka NEHU Shillong campus.
Insightful discussions in the National Seminar on ‘Representation of Women of North East India in Multi-Disciplinary Discourse’ organised by Don Bosco College, Tura.
Gender diversity & the representation of women in different fields is a subject matter that must take center… pic.twitter.com/Tj2PfSeqlz
— Conrad K Sangma (@SangmaConrad) April 28, 2023
Haba kren ha ka jingialang, u Myntri Rangbah ka jylla ula ong, ba ka sorkar kala pynwandur iaka prokram ban pynkup bor ia ki kynthei lyngba ki kam khaii pateng bapher bapher bad lyngba ka SHG movement, ka sorkar kan pynthikna ba ki kynthei kin long kiba khlain ha ka jingioh jingkot khlem da donkam ban shaniah ha kiwei pat.
Ula pyntip ha ka jingialang ia ki jingjia, ha kaba ki longkmie ba dang khynnah ka rta ki don hapdeng ka jingma ha ka jingkha khun namar ba ka khlem pynjlan iaka 3 snem ha ka rukom kha khun bad don ruh ki kynthei ba hapoh ka rta ba 23 snem kila dep ban kha khun haduh 5 ngut.
“Ngi la wanrah ia ka lad ban weng shi syndon ia katei ka jingeh ban pynthikna ba ki longkmie kin long kiba koit ba khiah. Ka Safe Motherhood Programme ka shimkhia ia katei ka byta jong ki longkmie. Ngi la sdang ruh iaki sienjam ban pynkup bor ia ki kynthei ha ka ioh ka kot, da kaba don bynta ha ki kam ban kamai kajih lyngba ki Self Help Group,” ong u Conrad Sangma bad ka bynrap ba ka sorkar jylla ka buh hakhmat eh ban kyntiew iaka ioh ka kot jong ki kynthei haka jylla.
Ula pyntip shuh shuh, ba ka jylla Meghalaya kadei kawei napdeng ki jylla ha ka ri, ha kaba 95% jong ki kynthei ha ki thain nongkyndong kidei kiba don bynta ha ka jingpyniaid shakhmat ia ki Self Help Group bad ki don palat 4 lak ngut ki kynthei kiba treiu ha ki SHG ha ka jylla hynrei hashwa u snem 2018 ki don tang kumba 35,000 ngut.
U Myntri Rangbah ula ong ba ki don ki jingeh kiba ki kynthei ki iatakhuh, hynrei ka sorkar ka dang iaid shakhmat ban wad ia ki lad ki lynti ban weng ia kitei ki jingeh.
Katba u Rakkam A Sangma, ula kren halor u synniang kaba ki kynthei kila noh shi kat dei ha ki liang bapher bapher bad ula kyntu ia ki kynthei ba kin iai bteng ha kaban iakhun ia ki jingeh bad jingtynjuh na ka bynta ban noh ia u synniang jongki sha ka imlang sahlang.
