Nongstoiñ, Ïaïong 28: U Myntri Rangbah Duh ka Ri Narendra Modi u la plie paitbah їa u transmitter u ba 100.1 mega hertz jong ka Community Radio Station ban wanrah ia ka jingmyntoi ia ki paid Nongshongshnong ba kin ioh ia ki jingtip kiba bun lyngba ki kor Radio.
Ha kane ka jylla ki don ar tylli k ki Community Radio Station kawei ha Nongstoiñ West Khasi Hills bad kawei ha Williamnagar ha East Garo Hills. Utei u transmitter ba thymmai u lah ban trei kam haduh 400.2 square kilometer.
Kitei ki Radio station ki dei kiba la slem bha hynrei ka jingtreikam kam pat lah satia ban pynhun ïa ki paitbah khamtam eh ha ki nongkyndong.
Nalor kata ha kine ki snem ba la dep baroh ka jingpyntreikam jong ki radio station ha ka jylla tang lyngba u Medium wave kam pat da shai bha. Hynrei lyngba une u transmitter ba thymmai ba la plie mynta ka sngi da u Myntri Rangbah duh ka ri, ïa ki jingtip lyngba ki radio station lah ban ïoh ha ki android mobile bad ki Iphone mobile ha baroh ki jaka.
Kumjuh ruh ïa ki khubor bad ki jingjia na baroh ki District bad ki jaka, lah ban tip lyngba da kaba pyndonkam ïa u App jong ki steshon.
Ha katei ka jingplie jong u Myntri Rangbah duh ka ri ïa utei u transmitter ba thymmai kaba la pynlong ha phyllaw jong ka ophis jong ka All India Radio kaba don ha Upper New Nongstoiñ, la wan ban їadon ryngkat da ki ophisar jong ki tnad treikam sorkar napoh ka District, ki rangbah shnong, ki nonghikai jong ka Anderson Higher Secondary School bad ki khynnah pule bad kiwei kiwei.
Ha kane ka sngi na ka liang ki nongpynїaid jong ka All India Radio ki la pynlong ruh їa ki jingkylli jingtip na ki khynnah skul halor ka jingplie їa ute u transmitter ba thymmai.
