Shillong, Iaiong 28 : U Myntri ka Tnad Animal Husbandry & Veterinary Bah Alexander Laloo Hek hynne ka sngi Thohdieng, ula pyntip ba ka Sorkar Jylla shen kan sa sdang ban tei ia ka Hospital ba pura tang jong ki mrad hangne ha nongbah Shillong.
“Ngi dang pynkhreh ia ka Detailed Project Report (DPR) ban buh ia kane ka Hospital mrad ha ka jingmang tyngka kaba kot T. 94 klur” ong u Bah Hek haba iakren bad ki nongthoh khubor.
Ula pyntip ba ka jaka ban shna ia kane ka project kan dei ha Upper Shillong. Kat kum ka jingong jong u, ia ka jingtyrwa yn sa phah sha ka Sorkar Pdeng ba kan bei tyngka.
Ka Jylla Meghalaya haduh mynta kam pat don satia ia ka Hospital ba pura ban sumar tang ia ki mrad wat hadien ka jingkynjoh ia palat 50 snem ka jingioh iala ka jong ka Jylla ba pura.
U Bah Hek ula ong ba ka Jylla mynta ka don tang ia ki veterinary dispensary jong ka Directorate of Veterinary ha East Khasi hills, Jaintia Hills bad Garo Hills.
“Namar kata, ka por kala dawa ba ngin ioh ia ka hospital ba pura tang jong ki mrad ka ban long ka jingkyrkhu kaba khraw ia ki paidbah ka Jylla” ula bynrap.
Haba kylli, u Bah Hek ula pyntip ba ia ka DPR yn sa pyndep noh ha u bnai ban wan habba bynrap “Ngin sa pan mardor ia ka jingiarap pisa na ka Sorkar Pdeng khnang ba ngin lah pynkloi noh ia ka jingshna ia kane ka hospital kaba donkam bha hapoh ka Jylla”.
Nalor kane, u Myntri ula pyntip ba ia mynta ka Jylla ka don palat 17 tylli ki veterinary mobile unit kiba dang treikam tang kum ka jingpyrshang.
Haba pynpaw ba ka Jylla ka don palat 264 ngut ki doktor veterinary, u Bah Hek ula ong “Shisien b aka Jylla kala ioh iala ka jong ka Hospital mrad, ka Tnad kan sa wad ia ki lad ki lynti ban aikam ia ki doktor ba thymmai, ki veterinary assistant bad kiwei kiwei ki nongtrei”.
