Nongpoh, Īaīong 27: U nongniah jong kawei ka kali kamai lem bad ki katto katne ngut kiba nongshong kali, ki la mynsaw, hadien ba ka kali kaba ki shong, ka la leit ban tynrah beit nadien ia kawei ka trok, kaba la sniew bad kaba ieng ha surokbah NH-6 bad kaba hap hapoh ka shnong Umiam.
Katei ka jingjia, ka la jia hynnin ka sngi ha ka por 7 baje eiei mynmiet, ha kaba katei ka trok kaba don ia u number AS-01-EC-4133, ka la ieng ha la ka jong ka liang, namar ba ka don jingthut, hynrei ha kum katei ka por, katei ka Maxx kaba don ia u number ML-10A-6962 bad kaba thmu ban kiew sha Shillong, ka la leit ban tynrah beit beit nadien kaba lam sha ka jingmynsaw u nongniah bad kiba shong hapoh katei ka kali.
Mar ia tip halor katei ka jingjia, ki Pulit ka Umiam Police Station, ki la leit mar mar sha katei ka jaka ban ai jingiarap ia kiba mynsaw bad kiba la pynkit noh mar mar sha Bhoirymbong CHC, na ka bynta ban ai jingsumar.
