Shillong, Iaiong 27 : Ka Riwar Mihngi Development Council (RMDC) kala dawa ia ka Sorkar Jylla ban ai jingiarap da ka song pisa sha ka Longiing jong ki arngut ki briew kiba iap na ka jingtwa khyndew ha surok Rngain, kaba don ha lynti na Shillong sha Dawki.
U President ka RMDC Bah Sinophil B Tariang bad General Secretary Dmuising Khongjurem hynne ka sngi Palei kila iakynduh ia u Sub Divisional Officer (Civil) ka Pynursla ban aiti ia kane ka jingdawa, haba dawa ruh ia ki Heh Ophisar ban pynkloi ia kane ka song jingiarap.
Kine ki arngut kiba iap ki dei ki bah Krejunelang Khongjirem bad Serborlang Jaktung. Kine kila iap na ka jingtwa ka khyndew ha surok Rngain myn ha ka 14 tarik Iaiong.
Ha kawei pat ka khubor, kawei ka trok dumper kala hap hynne ka sngi shapoh ka riat ha Langkyrdem kaba don marjan ka Pynursla hynrei donbok ba ym shym la don kano kano ka jingjia ba sngewsih.
Kat kum ka khubor, kane ka jingjia kala jia hynne ka janmiet por 5 baje hajan ka riat Rngain. La iathuh ba u Nongniah uba dei na Langkyrdem ula mynsaw bad la pynkit ia u sha Pynursla CHC.
