Shillong , Iaiong 27: Ka ophis u Mission Director ka National Health Mission (NHM) hynne ka sngi ka la rakhe ia ka ‘World Malaria Day’ halor ka phang pdeng ban ai ka jingshakri ha ka ban pynduh jait ia ka jingpang Khie Shohrih hapoh ka jylla.
Ia kane ka sngi ‘World Malaria Day’ la rakhe kum shi bynta ban ai ka jingpynshai ha ka imlang sahlang halor kumno ban leh naka bynta ban tehlakam ban pynduh jait ia ka jingpang Khie Shohrih.
Ha kane ka sngi, ka tnat NHM lyngba ka tnad jong ka Ministry of Health and Family Welfare ka sorkar pdeng kala pyntip ba ha u snem 2016 ka la plie ia ka National Framework na bynta ban pynduh jait ia ka jingpang Khie Shohrih hapoh u snem 2030.
La pyntip ba kane ka jingpang ha Meghalaya ka la hiar haba nujor bad u snem 2022 ha kaba ha u snem 2022 ki briew kiba don ia kane ka jingpang ki long 465.
Haba kren ha kane ka sngi ka Myntri ka tnat ka koit ka khiah ka Dr. Ampareen Lyngdoh ka la ong ba ka jingpang Khie Shohrih ha kane ka jylla ka la hiar bad ka la duna bha bad kane kadei lyngba ka jinglah ki nongtrei bad ki ophisar ka tnat ban pynshai paidbah iaki lad jingiada bad ki lad sumar na kane ka jingpang.
Ka Dr. Ampareen kala ong dei ban pyntikna ban iakhun pyrshah ia kane ka jingpang bad ki paidbah ki donkam ban tip kumno ban iakhun ia kane ka jingpang bad kumno ban leh lada ioh ia kane ka jingpang.
“Ka long kaba donkam ban peit bad ban phah eksamin (Test) ia ki don kino kino ki briew kiba don ia ki dak ki shin ia kane ka jingpang khnang ban lah ban ai jingsumar bad jingiada naka bynta ban pynduh jait ia kane ka jingpang” la ong ka Dr. Ampareen.
Ka Dr. Ampareen kala ong ba kum ka myntri ba khmih iaka tnat ka koit ka khiah ka kwah ban pyntikna ba ka jylla Meghalaya kan trei bha na bynta ban iakhun ia kane ka jingpang bad dei ban pyntikna ba ym dei ban tyllun biang kum ha ki por ba mynshwa.
