Dawa ka KSU ban weng noh ia ki shipai BSF na shnong Amlarem

Shillong, Iaiong 27 : Ka Khasi Students’ Union (KSU) hynne ka sngi Palei, kala dawa ia u Symbud Myntri Rangbah ka Jylla ba khmih ia ka Tnad kam pohiing Bah Prestone Tynsong, ba un tuklar lem ha kaban weng noh ia ki shipai BSF na shnong Amlarem, kaba jngai bah na khappud bad ka Bangladesh.

“Ngi la kyrpad ia u Symbud Myntri Rangbah ban pynthikna ia ka jingweng noh ia ki shipai BSF, kiba don beain mynta ha Iew Amlarem” ong u Presient ka KSU West Jaintia Hills District Unit samla Laitphar Syngkrem haba iakren bad ki nongthoh khubor hadien ka jingialang.

Ula kynnoh ba ki BSF kila pyndik ia ki trai shnong bad kurup ia ki mar ki mata bad ong “Ngi pynrem jur ia ki kam bala leh da ki shipai BSF da kaba pynlong ia ka jingtalasi beain ia ki mar ki mata jong ki trai shnong ka Amlarem bad ki shnong ba marjan”.

Haba pynpaw ba ki shipai BSF ki dei ha ka jingshisha ban pahara ha shnong khappud, u samla Laitphar ula pynkynmaw ba ka Shnong Amlarem ka dang jngai bah na khappud bad ka long kaba beain ia ki BSF ban talasi ia ki trai shnong.

Ka jingdon jong ki shipai BSF ha Amlarem kala kynjoh mynta ia ka hynriew bnai eiei.

Pule lang ia kane: Ujor ka NHPF ia ki arngut ki nong Assam ba kynnoh thok pisa ia ki paidbah

“Hashuwa kane, ngi la aiti ia ka jingujor sha u Deputy Commissioner bad SDO hynrei kim shym la leh eiei ia kane ka kam. Kane kala pynbor ia ngi ban wan iakren bad u Symbud Myntri Rangbah ba un leh eiei noh mardor” ong u samla Laitphar.

Haba kylli, une u Nongialam ka KSU-WJHDU ula ong “U Deputy Commissioner ula bthah ia u Deputy Commissioner ban leh eiei noh mardor halor kane ka kam”.

Hynrei ula maham pat ba lada ka Sorkar kam lah ban leh eiei halor kane ka jingeh ki paidbah, ka KSU kam don lynti pat da kumwei hynrei kan shim da ka rai ba tyngeh halor kane ka kam.

Nalor kane, u samla Laitphar ula kynnoh ba ki trai shnong kiba leit iew sha Dawki kila hap ban ioh ia ka jingbit na u Commandant ka BSF lem kumta ki mar ki mata jong ki, kin shah kurup bad yn rah sah ka ktem ki BSF.

“Ngi kwah ruh ban kylli ia ki BSF halor ka jingailad ia ki nong Bangladesh ban wan khaii be-ain ha Iew Dawki” ula ong.

Ha kajuh ka por, ka KSU-WJHDU kala dawa ruh ia ka Sorkar ban maramot noh mardor ia ka surok Jowai By-pass. Namar kane, ki kali rit kim lah shuh ban iaid na kane ka surok bad kila hap ban rung sha sor Jowai, kaba lam sha ka jingkhapngiah ki surok bad jingdheng kali.

Ula pyntip ba u Symbud Myntri Rangbah uba khmih ruh ia ka Tnad PWD(Road), ula kular ban sa khmih noh kham kloi ia kane ka kam.