Guwahati, Iaiong 26: Ka iingbishar Supreme Court ka la thung ia ka high-power Committee (HPC) kaba la aijingmut na ka bynta ban pynkynriah shuh shuh ia ki hati lem bad kiwei pat ki jait mrad na kane ka thain shatei lammihngi (Northeast) sha kiwei pat ki jylla jong ka ri. Kane ka la wan long hadien ba ki kynhun seng kiba khmih halor ka bha ka miat jong ki mrad bad ki nongtrei kiba khmih halor ki mrad khlaw ki la pynpaw ka jingsngewkhia kaba jur ha kaba iadei bad ka jingpynkynriah ia ki hati na kane ka thain Northeast shapoh Gujarat.
Ka HPC hapoh ka jingialam jong u Justice (Retired) Deepak Verma ha ka kaiphot jong ka, ka la aijingmut ban pynkynriah shuh shuh ia ki hati lem bad kiwei pat ki jait mrad khlaw na kane ka thain Northeast shapoh Radha Krishna Temple Elephant Trust kaba ha Jamnagar ha Gujarat ia kaba la kyrshan da ka Reliance Industries Limited.
Katkum ki khubor la iathuh ba haduh 20 tylli ki hati napoh Namsai ka Arunachal Pradesh la shem ba la pynkynriah noh shapoh Gujarat lyngba ka Assam ha ryngkat ka jingsynran jong ki pulit ia ki trok kiba kit ia kine ki hati.Haduh kumba 50 tylli ki hati, khamtam na ka jylla Arunachal Pradesh la pynkynriah noh shapoh Gujarat lyngba ka Assam naduh une u snem ba la dep.
Ka Tripura high court ha ka 7 tarik u Naiwieng jong ka snem ba la dep ka la thaw ia ka HPC ia kaba la khlieh da u nongbishar ka Supreme Court u justice Deepak Verma (retd) haba bishar bniah ia ka jingkyrpad kaba iadei bad kane ka jingpynkynriah noh ia kiba bun ki hati na kane ka thain Northeast sha Gujarat.
“Ki jingdonkam, ki jaka bad ki jingshna jong ka (Radha Krishna Temple Elephant) Trust ki dei kiba biang tam hapoh India, bad ka dei ruh kawei napdeng kiba paka tam ha ka pyrthei.Kumta ruh ka long kaba shong nongrim na ka bynta ban pynkynriah shuh shuh ia ki hati lem bad kiwei pat ki jait mrad kiba ioh ban pyllait im bad kiba donkam ia ki jingiarap ne jingsumar sha katei ka jaka.Ka jaka jong ka Trust ka long kaba heh shibun abd da kaba suk ka lah ban pdiang shuh shuh ia ki mrad khlaw kiba donkam ia ka jingiarap,” ong ka kaiphot.
Ha u bnai Lber 2023, haba pynsngew halor kane ka jingkyrpad, ka Supreme Court ka la pyniar ia ka jingtreikam jong ka HPC ban khmih ha kaba iadei bad ka jingpynkynriah ia ki hati kiba la shah set koidi hapoh kane ka thain Northeast, bad kaba la aibor ruh ha kaba iadei ba ki jingmynjur halor ka jingpynkynriah ia kine ki mrad kiba mad jingeh sha kino kino ki jaka ri lane ki zoo kiba don hapoh ka ri.
“Ka Trust ka dei ruh ban shim ia ka bynta ha kasba iadei bad ki kam pyllait im bad aijingiarap na ka bynta kiwei pat ruh ki jait mrad khlaw ia kiba la pyndonkam ha ki circus lane ki jingialehkai ha ki surok lane ban pyndonkam ha kaba khrong ha ki surok lane ha kiwei pat ki bynta.Na ka liang u Director General of Forests, Head of Project Elephant, Member Secretary, Central Zoo Authority, Chief Wild Life Wardens of Gujarat, Tripura bad Arunachal Pradesh ki lah ban shim ia ka rai ha kaba iadei bad ka jingpynkynriah ia kino kino ki mrad kiba mad jingeh sha katei ka Trust, kata ryngkat ka jingpynthikna ba ka Trust kan aijingsumar ia kine ki mrad hashwa ba ka jingpynkynriah kan treikam,” ong shuh shuh ka kaiphot.
