Shillong, Iaiong 26: U MLA barim ka Mylliem Bah Hamletson Dohling, hynne ka step sngi Balang, ula leit ban buddien ia ka jingpyntreikam ia ka skhim Jal Jeevan Mission (JJM) ban pynpoi umbam umdih ha ki Shnong jong ka thain Upper Shillong ban pynthikna ba ki paidbah ki dei ban ioh jingmyntoi na kane ka skhim.
U Bah Hamlet uba bat mynta kum u Nongai buit jong u Myntri Rangbah ka Jylla, ula hiar leit jurup ia ki tyllong um kiban pynpoi ia ka skhim JJM sha ka shnong Nongkseh bad Umlyngka, kaba don ha Umpaitmaw, Sangmein, Upper Shillong.
Haba iakren bad ki nongthoh khubor hadien ka jingjurip, u Bah Hamlet ula pynpaw ba ka jingjurip ka jong u ka long halor ka nongrim ban iohi ba kane ka skhim ka dei ban iaid shaid shaid khnang ba kan wanrah ia ka jingsuk ia ki paidbah ka thain da ka jingpoi kor um hala ki jong ki iing ki sem.
Pule lang ia kane: Pyntip u DyCM : “Ka Sorkar kan iakren tang ia ka Roster System ym ia ka Reservation Policy”
Namar ka jingeh ka Shnong bad jingbun ki Longiing, ka shnong Nongkseh bad Umlyngka ki ju ioh duna ka umbam umdih. Ha Nongkseh, ka Tnad PHE kala mang T. 15.84 klur ban pyntreikam ia ka skhim na ka bynta ki 1230 tylli ki Longiing katba ha Umlyngka la mang T. 28.89 klur na ka bynta ki 2242 tylli ki Longiing.
Ha kane kajuh ka sngi, u Bah Hamlet ula leit jurup ruh ia ki hynriew tylli ki jaka ksam um ki ban nang pynbun ia ka jingsam umbam umdih ha ka shnong Umlyngka.
Ia u Bah Hamlet la synran lang da ki Nongialam Shnong ka Umlyngka, ki Ophisar ka Tnad PHE bad kiwei kiwei.
