Nongpoh, ïaïong 25: Ka District Disaster Management Authority, Ri Bhoi District, Nongpoh, hynne ka sngi ba-ar ka la sam ïa ki “Emergency Responders Kits” ne ki tiar ban ïadabad ai jingiarap ia ki lanot ha ka por ba wan lynshop ki bor jong ka Mariang sha ki AAPDA Mitra Volunteers kiba dei ki samla ki ba la pyndep ïa ka jinghikai kumno ban ai jingïarap ia ki lanot ha ba wan lynshop ka bor jong ka Mariang.
Kitei ki samla kiba la ïoh ban pdiang ïa ki Emergency Responders Kits ki don haduh shispah ngut bad kitei ki shispah ngut ki samla ki dei kiba la dep ban pyndep ïaka jingshah hikai ha u snem ba la dep. Ka jingsam ïa kitei ki tiar sha ki samla ka long shibynta ban kin pynkhreh ha kaban ai jingiarap lada wan lynshop ka bor jong ka mariang naduh u Jumai, erïong, jingshlei um bad kiwei kiwei ki jingjia bym poi pyrkhat.
Ia kane ka jingialang la pynshongkun da u U Arpit Upadhyay, Deputy Commissioner ka Ri Bhoi District kum kongsan uba la sam ïa kitei ki ERK sha kitei ki shispah ngut ki samla ha ka jingïadon ryngkat lang u Dr. Abhishek Saini, Assistant Commissioner, Ribhoi District, M B Tongper Addl. Deputy Commissioner, Ribhoi District, ki nongtrei ka DDMA, Nongpoh bad kiwei kiwei.
Ki tiar ba la sam sha ki volunteer ki kynthup naduh ki first aid kits, ki juti phong, ki life jacket, torch light, ki jingput, ki botle um, uniform, ki mosquito net lem bad kiwei kiwei.
