Shillong, Iaiong 25: Ka Hynniewtrep Youth Council (HYC) hynne ka sngi Ba-ar, kala dawa ban tohkit halor ka jingkhie kynsan ka jingpang khieshoh hapdeng ki Nongshongshnong ka thain Shella bad kiwei ki shnong marjan bad ha ka juh ka por ka dawa ban pynbit pynbit iaki jingdonkam hapoh ki jaka sumar kum ka Ichamati CHC bad Shella PHC.
Ka HYC central body bad Shella Area Unit kala phah daka dorkhas sha ka ophis District Medical & Health Officer (DM&HO) East Khasi Hills ban tuklar mardor.
“Ngi dawa ban pynbiang iaki dawai dashin naka bynta kito kiba ioh pang jingpang khieshoh ha Ichamati CHC bad Shella PHC bad ha ka juh ka por ban tohkit kumno kane ka jingpang ka sdang kiew kynsan ha kane ka thain” la ong ka dorkhas.
Ka seng kala kyntu iaka ophis DM&HO ban shim khia halor ka jingbym biang ki lad jingsumar hapoh ka Shella PHC bad Ichamati CHC kiba hap hapoh ka Sohra Civil Sub-Division.
“Ngi la ioh jingtip ba kala don kawei ka jingjia ha kaba iwei khynnah ila ioh pang khieshoh bad ila leit ban shim dawai na Shella PHC hynrei hadien bala eksamin la lap ba kane ka jaka sumar kam biang ki lad jingsumar bad la pynkynriah noh ia i sha Ichamati CHC kaba jngai kumba 13-15 kms hynrei haba poi ha kane ka jaka sumar ruh la lap ba kane ka CHC kam don bad kam biang ki lad sumar bad la pynkynriah biang sha Sohra CHC kaba jngai kumba 45 Kms na Shella” la ong ka dorkhas.
Haba iadei bad kane ka HYC kala ong ba ka seng kam lah ban pdiang namar ka Ichamati CHC, kadei ka First Referral Unit (FRU) na kiwei pat ki PHC ba marjan kaba kane ka jaka sumar ka shakri iaki paidbah na ki shnong ba marjan hynrei la sym pynban ba kane ka jaka sumar ruh kam don dawai jingpang khieshoh.
Haba pynpaw ba kane ka jingpang khieshoh ka lah ban bit na ki briew, naka liang ka HYC kala kyntu iaka ophis DM&HO ban leh iaka ba donkam bad ban bthah iaki ophisar ka Shella PHC ban pynlong ka jingtohkit, ba kumno kane ka jingpang khie shoh ka sdang hapoh kane ka thain khnang ban tehlakam iaka jingsapriang kaba lah ban ktah ia kiwei pat ha kine ki shnong ba marjan.
