Shillong, Iaiong 24 : U Symbud Myntri Rangbah ka Jylla Bah Prestone Tynsong hynne ka sngi Ba-ar ula pynpaw ba ka jingpynkynriah ia ka Them Metor na Them Iew Mawlong kan hap ban urlong beit.
“Lada phi kylli ia nga la ka Sorkar kan pyniaid shakhmat ia ka jingtyrwa, ka jingtyrwa ka long kaba shai bha bad kumba nga ong naduh ka sngi ba nyngkong, ka jingpynkynriah kan hap ban jia beit kam pher ia kaei kaba phi ong” ong u Bah Prestone haba iakren bad ki nongthoh khubor.
Kane ka jingkynthoh jong u kala mih hadien ba ka Harijan Panchayat Committee (HPC) kala kyntait ia ka jingtyrwa jong ka Sorkar ban pynkynriah ia ki 342 tylli ki Longiing na Them Metor sha ka jaka jong ka Shillong Municipal Board (SMB).
Pule lang ia kane: Ai dorkhas ki lai Seng sha u Myntri halor ka jingpynlip bording ka MeECL ha Ri-Bhoi
U Bah Prestone ula ong b aka High Power Committee (HPC) kala dep kren shai ha ka jubab bala ai ha ka 20 tarik Iaiong ba “Kim shym la pdiang ia ka blueprint bala ai da ka Sorkar sha ki. Kane ka dei ka kam ba mynta”.
Haba kylli, u Symbud Myntri Rangbah ula pyntip ba u Advocate General ka Jylla ula pule ia baroh ki kot ki sla bad shen ka Sorkar kan sa shong ban iakren ia kane ka kam.
Ha ka sngi Nyngkong, ka Iingkashari Meghalaya High Court kala pynkynriah ia ka jingshong bishar ia ka mukotduma halor kane ka kam sha ka 7 tarik u Jylliew.
Ka Iingkashari kala pynmih ia kane ka hukum halor ka jingkyrpad jong ka Sorkar Jylla bad ka Harijan Panchayat Committee (HPC) ha ka jingshong bishar hynnin ka sngi.
Pule lang ia kane: “Tang da ka mukotduma jaka ban lah kyndang ia ki Harijan na Them Metor” ong u Nongiasaid Ain
