Shillong, Iaiong 25 : U Chief Executive Member (CEM) ka Jaintia Hills Autonomous District Council (JHADC) ma Thombor Shiwat ula pyntip ba ka Council ka long kaba kloi ban ai jaka sha ka Sorkar Jylla ha kaban weng noh ia ka jingeh ba iadei bad ka jaka theh niut ka sor Jowai.
Haba iakren bad ki nongthoh khubor hadien ka jingialang bad ka KHADC ha Shillong hynnin ka sngi, u ma Thombor ula pyntip ba ka Council bad ka Sorkar Jylla kila iakren na ka por sah ka por ban wad ia ka lad ka lynti ban weng noh ia ka jingeh ka sor Jowai.
Lah ban kdew hangne, ka sor Jowai ha u snem bala lah, kala kynton da ki niut kat shaba phai ki jaka namar ka jingbym don ia ka jaka theh niut.
U CEM u pyntip ba ka Council kala dep ban ithuh ia ki katto katne ki jaka ban pynlong jaka theh niut ka sor Jowai hynrei ka dang wad pat ia ka jaka kaba biang.
Ula ong ba ka Council ka kloi ban ai jaka khnang ban lah weng noh ia ka jingeh jong ka sor Jowai.
Haba kylli, u CEM ula pynpaw ia ka jingbym tip eiei hangno ba ka Jowai Municipal Board (JMB) kala theh ia u niut ka sor Jowai mynta.
