Shillong, Iaiong 23: Da ki spah ngut ki paidbah hynne ka sngi U Blei, kila iatuid sha ka jingrakhe ‘Chad Sukra’ kaba dei ka jingshad tynrai jong ki Pnar. Kane ka jingshad kadei ruh ka jingrakhe ia ka jingsdang jong ka aiom bet symbai haka bynta ka rep ka riang.
Ka Chad Sukra ka mut ka shad suk mynsiem bad ia kane ka jingshad la pynlong da ka Sein Raij ha Mynkoi Loompydiliongpiah Jowai bad ha kane ka sngi la wan shim bynta da ki samla shynrang, kynthei ha ryngkat ka riam tynrai.
Ka phang pdeng jong ka jingshad mynta u snem kadei ‘Chaniah tylli heimon mi Blai, kam wa pynkhroo iei wada dep booh mi I ha Pyrthai’ kaba mut ban shaniah ha u Blei.
Ia kane ka jingshad la wan sakhi da u Myntri sorkar bah Commingone Ymbon bad u MLA ka Jowai Bah Wailadmiki Shylla lem bad kiwei kiwei de.
Nalor ka jingshad tynrai la pynlong ruh ia ki jait prokram bala shim bynta da ka kynhun WWO SRJ, Chillingraij, Loomiongkjam, Panaliar, Dulong, ïongpiah, Loomkyrwiang, Umchangiar, Sein Tylli Lang bad ka Seinraij Ummulong, Seinraij Shillong, Ladthadlaboh.
