Shillong Iaiong 23: U samla Lambokstarwell Marngar bad u samla Donald V Thabah kin bteng biang ban shimti kum u President bad u General Secretary jong ka Khasi Students Union (KSU) hadien ka jingbym don ki dkhot kiban aireng haka elekshon jong ka seng kaban long ha u bnai Jymmang.
Haduh 30 ngut ki Dkhot ka seng kila thep kyrteng ban iakhun iaka elekshon kaba 15 jong ka KSU na ka bynta ka samoi treikam jong u snem 2023-2026 bad kine ki Dkhot kila iakhun na ka bynta ki kam ha ki kyrdan bapher bapher.
Na kitei baroh kiba la thep kyrteng, ym shim la don pat uno uno u dkhot uba la thep kyrteng ban iakhun iaka elekshon na ka bynta ka kam President, Vice President bad General Secretary.
Namar ka jingbym don kiba thep kyrteng ban iakhun ia kitei ki kyrdan, u samla Lambokstarwell Marngar ula jop suk ia ka elekshon kum u President, u samla Biangbor L Paliar ula jop suk iaka elekshon kum u Vice President bad u samla Donald V Thabah ula jop suk iaka elekshon kum u General Secretary jong ka KSU.
U Chairman ka Election Committee ka KSU Bah Danny Khyriem bad u Secretary u Bah Samuel B Jyrwa kila pyntip ba kila dep shong bishar iaka kyrteng jong ki kyrtong kiban iakhun ia ka elekshon na ka bynta ka kam Assistant General Secretary, Organising Secretary, Education Secretary, Information & Publicity Secretary, Office Secretary, Sports & Cultural Secretary bad Environment Secretary.
Ka elekshon ban jied ia ki nongkitkam ba thymmai ka KSU kan long haka 6 tarik u Jymmang ha Dinam Hall, Jaiaw bad kan sdang naduh ka por 8 baje mynstep haduh ka 3 baje nohphai sngi.
