Shillong, Iaiong 22: Ki riewngeit Muslim kiba don ha ka jylla Meghalaya, hynne ka sngi kila rakhe iaka Eid-ul-Fitr da kaba leit iashimbynta haka jingleh niam kaba la pynlong ha ki Mosque kiba don ha kylleng ki jaka.
Lah ban ong, ba ka jingrakhe iaka Eid kaba heh tam kadei hi ha nongbah Shillong ha Madina Masjid kaba don ha Laban, ha kaba da ki hajar ngut ki riewngeit Muslim kila leit sha ki Masjid ban iashimbynta ha kane ka sngi kaba khraw, ban pyndonburom ia u Prophet Muhammad, hadien ba la kut u bnai Ramadan uba khein khuid bad ki shah thngan.
Hadien bala pyndep iaka jinglehniam lehrukom, ki riewngeit Muslim ki ai khublei mar kylliang bad kila ai jingiarap ruh ia kiba duk ha kum kane ka sngi kaba kyrpang bad hadien kane ki leit ruh sha ki iing ki sem jong ki bahaiing ne ki paralok ban ai khublei ia ki bad ban ia bam sngewbha ha kane ka sngi lehkmen.
