Guwahati, Iaiong 22: U Myntri Rangbah (CM) ka Assam u Himanta Biswa Sarma u la pynmih ka jingmaham ia ka party Congress da kaba ong, ki pulit kin shim ia ka jingpynshitom lada kane ka party kam lah ban shimkhia ha kaba iadei bad ki jingkynnoh ba la ujor pyrshah da ka Angkita Dutta.
Ka Dutta ikaba dei ka nongialam jong ka Assam Youth Congress (AYC) ka la ujor pyrshah ia u national president ka Indian Youth Congress (IYC), u Srinivas BV, halor ki jingkynnoh banbor kiba la ktah ia ka bor pyrkhat pyrdain jong ka nalor ka jingktahkti bad kren bein kren khoh pyrshah ia ka.
Haba kren sha ki lad pathai khubor, u CM Sarma u la ong; “Ka rukom ba ka Congress ka la shim ha kaba iadei bad kane ka mat ka long kaba sngew bynnaiw shibun.Ka Congress ka Assam ka donkam ban pynbeit mardor ia kane ka jingeh.Nga dang ngeit skhem ba kane ka dei ka kam pohiing ka jong ki.”
“Ka Angkita Dutta ka dei ka nongshong shnong ka Assam, hynrei kumno ba ka APCC ka la shim ia kane ka mat ka long kaba sngew bynniaw shib un.Ki la don sha ka liang u Srinivas BV. Nga sngew ba kan long kaba biang eh lada ka Congress ha Assam kan ieng na ka bynta ka Angkita Dutta bad ban pynpaw ia ki sur jingkyrshan ki jong ki na ka bynta jong ka,” ong shuh shuh u Sarma.
“Hynrei, watla katta lada ki pulim ban shimkhia halor kane ka mat, na ka liang ki bor pulit kin shim ia ki sienjam.Ka National Comission for Women (NCW) ka la dep lypa ban thoh sha u DG ha kaba iadei bad kane ka bynta,” ong u Sarma.
Ki pulit ka Assam hynnin ka sngi Thohdieng ki la rejistar case ba la ujor da ka nongialam ka Assam youth Congress (AYC) ka Angkita Dutta pyrshah ia u National President ka Indian Youth Congress, u Srinivas BV hapoh Dispur police station, kata katkum ki jingujor ba la ujor pyrshah da ka Dutta.
Ha kawei pat ka bynta na kal iang ka Indian Youth Congress ka la kynnoh ia ka Dutta halor ka jingpynjah burom pyrshah ia u Srinivas na ki daw jong ki kam sain hima sima.
