Nongstoiñ, Ïaiong 21: Ka St Peter’s Higher Secondary School Pyndengrei, ka la rah ïa ka nam lahduh jong ka Chief Minister 28th District Level Inter School Athletic Meet 2023, ba la pynïaid da ka ophis jong ka District Sports Officer West Khasi Hills District, ha madan NDSA Nongpyndeng Nongstoiñ.
Kane ka nam lahduh sha ka St Peter’s HSS kala wan namar ka don ha ka ïa ki rang bad thei ïalehkai kiba tbit, kiba la lah ban ïalehkai bha bad khur ruh haduh 17 tylli ki takma ksiar, 15 tylli ki takma rupa bad 12 tylli ki takma rynnong. Katba ka Sib Singh HSS ha ka kyrdan ba ar ka la ïoh 10 tylli ki takma ksiar, 14 tylli ki takma rupa bad 10 tylli ki takma rynnong.
Ïa ka nam Best Athlete ha ka Under 14 Boys la ïoh da u Bobinchal Wanniang na ka St Peter’s HSS, ha ka Under 14 Girls la ïoh da ka Phibapynsuk K.Jana jong ka Anderson HSS. Ha ka Under 16 Boys la ioh da u Nicky Mawsor jong ka Anderson HSS, Under 16 Girls la ioh da ka Tresha Nongbri jong ka Sib Singh HSS.
Ha ka Under 18 Boys la ioh da ka Shaipharlin Nongsiej jong ka St Peter’s HSS bad na ka liang ki kynthei la ïoh da ka Albamary Sohshang jong ka St Peter’s HSS.
Kumjuh ruh ïa ka nam Best Team na ka liang ki kynthei bad shynrang la rah da ka St Peter’s HSS. Katba napdeng ki 19 tylli ki kynhun jong ki skul kiba la shimbynta ha ka March Pass, ïa ka nam lahduh la rah da ka Jawahar Navodaya Vidyalaya School Nongpyndeng Nongstoiñ
Lah ban pynkynmaw ba kane ka lympung ba lai sngi lynter jong ki 26 tylli ki skul ka la ïaid beit hapdeng ka jingphuh jingphieng bad hynne ka sngi pynkut, la donlang ryngkat ruh da u DSO barim u ba long mynta u Assistant Director ka tnad ïalehkai ka Jylla, Bah Païa War Nongbri ryngkat I DSO ba mynta I kong Balarina Syiem. Katba I kongsan I dei Additional Deputy Commissioner jong ka West Khasi Hills Kong B.Blah, iba la shim ruh ïa ka bynta ban sam ïa ki khusnam sha ki nongjop bapher bapher.
