Shillong, Iaiong 21: U Chief Executive Members (CEM) ka Khasi Hills Autonomous District Council (KHADC) bah Titostarwell Chyne hynne ka sngi Thohdieng, ula pyntip ba ka jingleit khynra ka KHADC iaki briew kiba shongdie jingdie ne kiba plie dukan, kam thew iano iano hynrei ka thew thik tang ia kito ki bar jylla ki bym don iaka Trading License.
Kane ka jingkren u CEM ka KHADC kadei hadien ba ka seng ki nongdie madan kata ka ka Meghalaya Greater Shillong Progressive Hawker and Street Vendor Association (MGSPHSVA), kala phah daka shithi ha ryngkat bad ka jingkynnoh ba ka jingkhynra Trading License ka KHADC kadei ka jingpynkhein iaka hukum ka ïing kashari.
Hynne ka sngi ki nongialam ka seng MGSPHSVA kata ka kong S Thabah bad ka kong Biolin Pyrtuh kila phah daka shithi sha u CEM ka KHADC bad kila kynnoh ba u CEM ula pynkheiñ ia ka hukum ka ïing Kashari daka ba leit kyndang ia kiba shong die madan.
Haba pynshai ia kane u bah Titos ula pynshai daka ba ong “Ka jingleit kyndang ka KHADC kadei thik iaki bar jylla ki bym don iaka Trading License bad kiba shong die madan bad kiba plie dukan ha u pud u sam ka District Council.
U bah Titos ula ong ba ka District Council kam don bor ban beh iaki ba shong die madan kiba biang iaki kot ki sla ne iaka Trading Linces namar ia kane la khmih bad peit hi daki bor district.
“Kane ka jingkam ka seng MGSPHSVA ba ka KHADC kala pynkhien iaka hukum ka ïing kashari kam don nongrim bad ka jingkylli ka mih mynta, iano kane ka seng MGSPHSVA ka kwah ban iada, ia ki bar jylla ne iaki briew lajong” la buh jingkylli u bah Titos.
U bah Titos ula ong ba ka jingkam jong ka seng MGSPHSVA ka long ka bym don nongrim bad kam don jingiadei bad ka jingleit kyndang ka KHADC namar wat ka ïing kashari ruh ka khlem bthah ban ia shong die jingdie katba mon ne ban ialeh katba mon hynrei baroh ki hap ban bud ryntih ia ki aiñ kiba la don.
Nalor kane u CEM ka KHADC ula kyntu ia u syiem ka Hima Mylliem ba um dei shuh ban ai ia ka No Objection Certificate (NOC) ia ki bar jylla ban plie hi ia ki dukan ki jong ki khlem da ioh iaka Trading License bad iaki kot ki sla ba donkam naka KHADC.
