Shillong, Iaiong 21 : U Myntri ka Tnad Public Health Engineering (PHE) Marcuise N Marak hynne ka sngi Thohdieng ula pyntip ba ka jingslem ban pyndep bad plie ia ka Greater Shillong Water Supply Scheme (GSWSS) Phase-III ka dei namar ki kam jaka puta.
Haba iakren bad ki nongthoh khubor, u Marcuise ula ong “Namar ki kam jaka, ka project kala sahteng lem kumta ngin jin sa la lah ban plie noh shen ia ka. Watla katta, ngi la pyrshang katba lah ban iakren bad ki trai jaka ha kaban pynbeit ia kane ka kam”.
U Marcuise ula ong ba ka kam jaka ka dei halor ka jingsiang ia ki pipe um bad ka jingshna ia ki top ha ki katto katne ki jaka bad ki trai jaka kila dawa ban aikam aijam ia ki. U la ong ba ka sorkar kala shim ia ka sienjam ban pynbeit ia kane ka kam kham kloi kat kaba lah bad ban pynthikna ba ka jingplie ia ka GSWSS Phasi-III kan sted noh.
“Nga kwah ban kyntu lyngba jong phi sha baroh ki kynhun ba kin iatreilang bad ka Sorkar lem bad ka Tnad khnang ba ngin lah pyndep noh ia ka project kham kloi namar kala shu sahteng la slem bha” ula ong.
