Nongpoh, Iaiong 19 : Ki runar ki bym lah ban tip ki dei kiei, kila thang dusmon ia kumba 2000 tynrai ki symbai siej kiba la don kumba shisnem tam bala thung da ka Ri-Bhoi Tourism & Environmental Development Forum (RBTEDF) ha ka khlaw siej kaba don ha ka shnong Umskun, Ri-Bhoi.
Haba pyntip ia kane, u Chairman ka RBTEDF Bah Plielad Tiewsoh ula pyntip ba kane ka jingjia kala jia ha ka miet 12 tarik mynta u bnai bad la ong ba ka ding kaba klang bha, kala bam duh ia katei ka khlaw thungsiej bad baroh ki symbai bala thung da ka synjuk.
U pyntip ba ka synjuk kala thung haduh 4000 tynrai ki siej ha kane ka khlaw hynrei da ka jingkloi iarap jong ki nongrep na ka shnong Umskun, la lah ban iada ia mar shiteng ki tynrai da ka jingkloi pynlip ia ka ding.
U Bah Tiewsoh u iathuh ba ki siej kila don kumba 2 lane 3 phut ka jingjrong.
Kat kum ka jingiathuh jong u, kine ki tynrai siej ne ka jingthung siej ha kane ka khlaw ka dei kaba la bei tyngka da ka North East Cane Bamboo Development Council jong u snem 2021-2022.
