Nongpoh, Iaiong 19 : Ki Dorbar Shnong jong ki 9 tylli ki Shnong ka Eastern Ri-Bhoi, kila thaw ia ka kynhun Umiam Hazard Area Collective Forum (UHACF), ban pynbor ia ka Sorkar Jylla ba kan wanrah ia ki lad jingiada iaki Nongshongshnong kiba sah sha kjat jong ka Pung Umiam namar ka jingma bad ka jingsyier ia ka jing bthei jong ka pung na ka jingkieng kaba la shongtor.
Ia kane ka kynhun la thaw ha ka jingialang jong ki Rangbah Shnong kine ki khyndai Shnong kaba la long hynnin ka miet 18 tarik Iaiong ha shnong Mynsain, Ri-Bhoi District.
Ki Rangbah Shnong kila thaw shuwa ia ka Adhoc Committee jong ka UHACF ia kiban sa pynskhem ha kine ki khyndiat sngi bad kane ka Committee ka kynthup ia u Bah Lamang Manik Syiem kum u Legal Adviser, Bah Hillary Shadap Rangbah Shnong ka Umtngam kum u Secretary bad kiwei kiwei.
Ha kane ka jingialang, ki Rangbah Shnong kila iatai ruh halor ki jingshah ktah ba khah khah jong ki Nongshongshnong ha ka por ba pyllait um na ka pung Umiam kaba pynjulot lut ia ki jingthung jingtep bad buh jingma ia ki mynsiem briew.
Haba kren sha ki lad pathai khubor, u Secretary ka Adhoc Committee Bah Hillary Shadap ula pynpaw “Ka Committee ka dawa ia ka Sorkar ban wanrah ia ki lad jingiada ia ki nongshongshnong bad ki jingthung jingtep lada jia ryngkhat ba bthei ka jingkieng ba den ia ka um ha pung Umiam”.
“Ngim kwah ia ka pisa ba phin ai jingiarap ynda ngi la shem lanot hynrei ngi donkam ia ki jingiada namar ym don ba lah ban tip ha kano ka por ba ka pung Umiam kan bthei” ula ong haba bynrap “Kumba long mynta hi, ki nongshongshnong kila don lypa ha tmier jong ki jingma”.
Halor ka jingjulor ki jingthung jingtep na ka jingpyllait um, u Bah Hillary ula ong “Ki Nongrep kiba don haduh 80% eiei naduh Umden Umsaitprah haduh Umtngam kila mad la bun sien ia ka jingduhnong ha ka por pyllait um hynrei kam ju don ka jingai jingiarap na ka MeECL ne na ka Disaster Management”.
Ka AHACF ka dawa ia ka Sorkar Jylla ba ka dei ban wan jurip ia ki shnong kiba don hakjat jong ka pung Umiam kiba don kumba 20 tylli eiei bad ki jingshah ktah jong kine ki Shnong ha ka por pyllait um na ka pung bad ka jingma kaba ap ia ki lada jia ryngkhat ba bthei ka pung.
