Itanagar, Iaiong 19: Ka National level conference ba ar sngi halor ka mat kaba iadei abd ka “Nalanda Buddhism” ka la kut noh ha Gorsam Chorten, kata ha ka jaka them kaba itynnad jong ka Zimithang hapoh Tawang Distirct ka Arunachal Pradesh ha ka 17 tarik mynta u bnai.
Ka jingpynlong ia kane ka jingialang ka thmu ban lapdien ha kaba iadei bad ka tynrai jong ka Nalanda Buddhism ha ka thain Himalaya jong ka ri bad ruh ban pynpaw ia ka jingsarong halor histori jong ka jingjop ha ka jingngeit niam ka ba don ia ka jingiateh lang ia kine ki thain ha kaba iadei bad ka niam ka rukom.
Ia kane ka jingialang la pynlong naduh ka 16 tarik mynta u bnai lyngba ki jingduwai ha trai jong u dieng ba kyntang ha Khinzemane hapoh ka jingialam jong u Eminence Lochen Tulku Rinpoche ha ryngkat ki 45 ngut ki nongialam niam Buddhist kibna hadien ki la pynlong ka jingleit leit jurip ia ka Surwa Samba War Memorial shibynta ban rakhe kynmaw burom ia ki riewshlur kiba la aiti la ka jingim ha ka thma jong u snem 1962.
Ha kane ka jingialang kaba la kut noh ha ka 17 tarik mynta u bnai la sakhi ia ka jingwan iashim bynta jong kiba bun ki nongialam niam, ki heh sorkar kynthup ruh ia u Myntri Rangbah (CM) ka Arunachal Pradesh u Pema Khandu.
La sdang ia kane ka jingialang lyngba ki jingkyrkhu kyrdoh bad ka jingthang ia ki mombati ha ka rukom ka jingleh niam tynrai bad hadien bud sa ka jingkren na u nongialam niam ba halor u Eminence Lochen Tulku Rinpoche bad u Thegtse Rinpoche.
La pynkut noh ia ka jingialang kaba la long ha ka por mynstep lyngba ka jingkren jogn u CM ka jylla u Pema Khandu, abd ha ka por janmiet la pynkut da kaba phaikhmat halor ki jingiaid lynti bad ki jinghikai jong ki riew shemphang kiba la leit noh jong ka Nalanda bad u riewniam Guru Padmasambhava.
Ka jingialang ha ka por janmiet ka phaikhmat halor ki jingeh jong ka niam Buddhist na Nalanda ha kane ka spah snem kasba 21, bad hadien bun da ki prokram kiba pynpaw halor ki kolshor kiba kynthup ia ki jingshad bad ki jingrwai.
