Aizawl, Iaiong 19 :Haduh kumba 800 ngut ki phetwir nong Myanmar la kam ba ki la wan poi hapoh Champhai district ka Mizoram, kata hadien ba ki la phetkrad namar ka jingiaumsnam ha la ka jong ka ri bad hadien ka jingther bom kaba na suin da ki shipai ka Myanmar.
Ha kane ka sngi ba Ar ba la lah, ki nongialam jong ka Village-Level Committees on Myanmar Refugees (VLCMR), ne ka kynhun kaba khmih ha kaba iadei bad ki phetwir nong Myanmar ki la pynthikna ha kaba iadei bad kane ka jingjia.
Katkum ka khubor heh sorkar la ong ba ki la don haduh 820 ngut ki phetwir nong Myanmar kiba la wan poi hapoh ka jaka shong shipor jong ki phetwir, katba 30 ngut kiwei pat kiba dei na ka jylla Chin ka Myanmar kiba wan wad jaka shong shipor hapoh ka shnong Vaphai.
Kumba ka long mynta ki la don haduh 1,812 ngut ki phetwir tang hapoh ka shnong Farkawn, kata kito kiba wan na ka sor rit Haslkha, Thangtlang, Tlangpui, Farkawn bad na ka shnong Tlanglo kiba hapoh Myanmar Myanmar.
Katkum ki tyllong khubor, ka dawbah halor kane ka jingwan poi thymmai jong ki phetwir ka dei namar ka jingiaumsnam kaba jur ha ka jylla Chin, kata hapdeng ki bor shipai ka Myanmar ba la tip kum ka Tatmasdaw bad ki riewialeh na ki kynhun riew paidbah kiba ieng pyrshah ia ki.
Ka jingshah thombor ba khah khah jong ki shipai Myanmar ha ki dkhot jong ki kynhun kieng atiar bad ki riewialeh pyrshah na ki kynhun kieng atiar riew paidbah, kum ka Chin Defence Force (CDF) la ong ba ka la pynlong ia ki shipai Myanmar ba kin pynphai kylliang da kaba tyngeh, kata lyngba ka jingther da ki tiar siat artillery bad lyngba ki jingthombor kiba na suin pyrshah ia ki shnong ki thaw.
Kiba bun na ka riew paidbah kim don lad da kumwei pat hynrei ban phet krad noh na ki sorbah bad ki shnong kiba don ha ki thain ba kyndong namar kane ka jingthombor jong ki shipai.
Ha kane ka sngi Saitjain ba la lah haduh kumba 40 tylli ki iing ki sem ki la shah pynjulor noh hapoh ki jaka shong shipor ha Hniarlawnthar hapoh ka sor rit Halkha ha ka nongbah jong ka jylla Chin kaba la pynlong ia ki nongshong shnong ba kin hap ban phet krad bad iehnoh ia la ki jong ki iing ki sem.
Na ka liang ka Mizoram ka la dep lypa ban pdiang haduh kumba 31,000 ngut ki phetwir nong Myanmar naduh ba ki shipai ki la kurup ia ka bor synshar naduh u bnai Rymphang 2021.
