Shillong, Iaiong 17: Ka Heh ka tnad ka Koit ka Khiah haka jingialam u Secretary Ram Kumar kala iaid jurip ia ki jaka ai jingsumar ka Sorkar ha kylleng ki District ka Jylla ban khmih ia ki jingbit jingbiang bad ki jingduna kiba don ha kine ki jaka ai jingsumar.
Kane ka jingjurip kaba neh haduh 5 sngi lynter- kala sdang naduh ka 11 haduh ka 15 tarik iaiong 2023 bad ki District kiba ka kynhun kala leit iuhkjat ki dei ka East bad West Jaintia Hills, East Khasi Hills, Ribhoi, North Garo Hills and East Garo Hills, South Garo Hills, West Garo Hills bad ha South West Garo Hills.
Kane ka jingleit jurip iaki jaka ai jingsumar kadei ruh ban peit la kine ki jaka sumar ki donkam ne em ban maramot ia ki jingtei bad ki jingbit jingbiang bad ban pynthikna ban ai iaka jingsumar kaba paka ia ki paitbah ka jylla Meghalaya.
Kane ka jingleit jong ki ka long ban tip kham bha bad ban ialeh ha kaban nang pynbha shuh shuh ia ka rukom ai jingsumar ha ka jylla bad ban pynshlur ia ki paidbah bad leit wad ia ki jingsumar ha ki jaka ai jingsumar haba pang ba shitom khamtam ki longkmie ba armet khnang ban lah pynduna ia ka jingiap ki khyllung ha ka por ba kha.
Ha ka jing leit ban jurip ki briew ka tnad ka koit ka khiah ki la ioh ban iakren bad ki nongtrei, ki paidbah ba wan shah sumar.Kane ka jingleit jurip kadei ruh ban sngew iaka jingeh ba ki nongsumar ki iakynduh naka por shaka por.
Ha kane ka jingleit jurip, ki ophisar ka tnat nalor ba kila iakren halor ki lad ban kyntiew bad pynbha iaki lad jingsumar kila iakren ruh kumno ban pyntrei khambha iaka iaki First Referral Units, CM-SMS, MOTHER App, ka MHIS bad kumno ban kyntiew bad ban pynbha iaki PHC, CHC nalor kiwei kiwei de.
U Secretary ka tnat ka koit ka khiah ula pynpaw ia ka jingsngewtynnad ia ka jingtrei shitom bad len lade jong ki nongtrei bad u la ai ka jingkyrkhu kyrdoh ia ki ba kin nang lah ban nang ia trei kham bha ban ai jingshakri ia ki paidbah ha ka jylla.
