Shillong, Iaiong 17 : Ka Iingkashari Meghalaya High Court hynne ka sngi Nyngkong, kala bthah ia ka Sorkar Jylla ban file affidavit kaba kdew ia ki sienjam bala shim bad ba tyrwa ban shim ha kaban pynduna ia ka jingdheng kali ha Nongbah Shillong.
“ Ka affidavit ka Jylla ka dei ban kdew ia ki plan ki ban pyntreikam ha kine ki khyndiat bnai, kito kiban pyntreikam ha kine ki khyndiat snem ban wan bad kiban pyntreikam shirta haba buh hakhmat ia ka jingnang kharoi ki kali shimet bad ki kali ha surok, ka jingkiew ka kam jngohkai bad ka jingdon ki jaka ba lait thylli” ong ka Division Bench ha ka hukum bala pynmih halor ka PIL jong kane ka kam.
Kala ong ba ha ki bnai bala dep, ka Jylla kala pynpaw ba bun na ki kmie kpa jong ki Khynnah skul ha Nongbah kila mynjur ban phah skul ia ki khun da ki bos skul haba buh kyndon ba ka Sorkar kan shim ia ka jingbah khlieh ban pyniaid ia kine ki bos.
“La pynpaw ba kumba 50 haduh 60 tylli ki bos la dep ban thied na ka bynta kane ka kam. Hynrei, ym shym la iohi pat ba kan don ka jingpyntreikam” ong ka Iingkashari.
Nalor kane, ka Iingkashari kala ong ruh ba kila don ki plan ba shirta bad ba shipir kiba la dep ban pynpaw khamtam ka jingpyntreikam ia ki jingai jingmut jong ka IIM, Shillong bad da ka Agency nabar ri bala buh da ka Sorkar Jylla na ka bynta kane ka kam.
“Shuh shuh, ym shym la paw ruh ba kan don jingmih eiei nalor ka ropeway bala plan bad kata ruh, na ka bynta ki kam jngohkai”kala bynrap.
Ka Iingkashari kala buh ban shong bishar biang ia kane ka kam ha ka 3 tarik u Jymmang.
