Shillong, Iaiong 17: Ka Voice of the People Party VPP (VPP) hyne ka sngi Nyngkong, kala sdang ia ka jingiaid pynshai paidbah na Mawlai halor ka jingdonkam ban bishar bniah biang iaka bhah thungkam lane ka Job Reservation Policy bad ka jingdonkam ban pynsangeh shwa iaka jingpyntreikam iaka Roster System.
Ha kane ka jingialang daki spah ngut ki paidbah kila wan ban sngap iaka jingpynshai u President ka VPP bah Ardent Miller Basaiawmoit u ba dei ruh u MLA ka Nongkrem ha ka jingdon lang kiwei ki MLA ba kynthup u MLA ka North Shillong bah Adlebert Nongrum, MLA ka Mawryngkneng bah Heavingstone Kharphran bad u General Secretary ka VPP bah Ricky Syngkon.
Haba kren ha kane ka sngi u bah Ardent M Basaiawmoit ula ong ba kane ka jingialang na Mawlai kan long ka jingsdang jong ka party ban iakhun pyrshah iaka sorkar kaba ka leh mynthi iaka jingdawa bishar biang iaka Reservation Policy bad ban pynsangeh shwa iaka jingpyntreikam iaka Roster System.
U bah Ardent ula iathuh ba ka VPP ka la ialeh ban iakren ia kane ka mat hapoh ka ïing dorbar hynrei ka sorkar jylla ka khlem ailad bad dei namar kane ka VPP kala shim iaka rai ban iakren ia kine mat sha ki jingialang paidbah ban pynshai sha ki paidbah.
“Ka VPP ka dawa naka sorkar ban pynsahngeh shwa ia ka jingthep kam, pynsangeh shwa iaka jingpyntreikam iaka Roster System bad ban pynbeit shwa iaka bhah thungkam lane ka Reservation policy bad lada ka sorkar kam pynsahngeh shwa ia ka jingpyntreikam ia ka Roster khlem pat bishar bniah shwa ia ka Reservation Policy, ka VPP haka jingkyrshan ki paidbah kan mih madan” la ong u bah Ardent.
U bah Ardent ula kam ruh ba ki la don katto katne ki ba pyrshang ban pynsngewthuh bakla ia ki paitbah jong ka jylla ba ka VPP ka pyrshang ban wanrah ka jingiapher jaitbyndriew hynrei ka party VPP kam kwah ban thaw kano kano ka jingpynsngewthuh bakla ha pdeng ki Khasi-Jaintia bad ki paralok Garo.
Ula ong ruh ba ka VPP ka dawa ba ka sorkar jylla kan thaw shwa da ka Expert Committee ban kynthup long dkhot ia ki Khasi-Jaintia bad Garo ban iathir halor kane ka jingdawa bishar biang iaka Reservation Policy bad kumno ban iaid shakhmat ka jingpyntreikam iaka Roster System.
“Ka jingialeh ka VPP ka long ym ban pyrshah ia kino kino jaitbynriew hynrei ka jingialeh pyrshah ka long beit pyrshah ia ka sorkar jylla” ula ong.
