Shillong, Iaiong 17: U G20 Sherpa u Amitabh Kant hynne ka Lah Sngi u Blei, ula ong ba ka Shillong kan don iaka bynta kaba khraw ha kaban kyntiew iaka Space Technology ha ka thain Shatei Lam Mihngi da ka jingdon jong ka Space Centre ha kane ka jaka.
Haba iakren bad ki lad pathai khubor hadien bala wai ka jingialang Space Economy Leaders Meeting (SELM) hapoh jong ka GS Presidency of India, kaba la long ha Courtyard Marriot Hotel, u Amitabh Kant ula ong ba ka sorkar pdeng kala pynmih iaka polisi treikam kaban ai jingiarap kyrpang na ka bynta kiba seng kam lajong ha kaba iadei bad ka haw-haw hapoh ka ri India.
Ula ong ba kila don 500 tylli ki Startups kiba la dep ban rejistar ha ka Space Sector bad kila long kiba la khreh ban ai jingkyrshan kaba pura iaki nong India khnang ba kin ialam ha ka Space Sector hapoh ka ri.
U Kant ula ong, ba ka jingialang kan peit ha baroh ki liang kiba kongsan na ka bynta ban pyndonkam iaka Space Economy na ka bynta ban kyntiew ia ki ri, kumno ba kin pyniaid iew ha kaba iadei bad ka Space bad kumno ban pyndonkam ia ki bor kaba ioh na ka haw haw.
“Ngin peit ruh ia ka bynta kaba iadei bad ka Space Mining bad kine baroh ki long kiba donkam namar ba kiwei pat ki ri ruh ki dang iaid shakhamt halor kane ka bynta. Ha India, ka space sector kala sted bha bad dang shen ka sorkar kala pynmih iaka Space Policy kaban ailad ia ki Startups ban leh ia ki kam lyngba ka jingbuh ia ki kor ha haw haw na ka bynta ka ri” ong u Kant.
Ula ong ba ka jingiatai bad jingiathir jingmut kala long kaba biang bha namar ka long kaba donkam ban don ia ka jingiatreilang bad ki ri kiba don ha ka G20 bad ula ong, naka bynta ka lawei, ka long kaba kongsan ban iatrei ryngkat ha katei ka liang ban don ia ki kyndon, ki jingtehpyrkhing bad ki polisi.
“Ngi la maitphang ia ka jingiatai namar ka ISRO kum ka nongialam ha haw-haw jong ka ri India ka hap ban leh ia ka bynta kaba khraw ha kaba iadei bad kane ka mat baroh kawei” la ong u Kant.
