Shillong, Iaiong 17 : U Myntri Rangbah ka Jylla Conrad K Sangma hynne ka sngi Nyngkong ula ong ba kan biang palat lada ioh ia ka Centre jong ka Indian Space Research Organisation (ISRO) ha Meghalaya.
“Hynrei, ngi la don ia ka North Eastern Space Application Centre (NESAC) bad kane ka dei kaba heh bha. Namar kata, ka jingkylli ban dawa eiei ka dei ka bym kut satia, nmar kata ngi lah ban dawa ia shibun kiei kiei hangne hynrei kaei kaba kongsan ka long la ngi lah ne em ban pyndonkam ia kane ka Shnat Treikam na ka bynta ka jingmyntoi jong ka thain bad ka Jylla bad ki nongshongshnong” ong u Conrad haba iakren bad ki nongthoh khubor.
“Bad ia mynta hi, ngi sngew ba ka jingdon ka NESAC ruh ngi khlem lah ban pyndonkam thikna kumba dei ban leh” ula bynrap.
U Myntri Rangbah ula ong ruh “Lashai lada phi mut kylli ia nga ba ngi kwah ISRO Centre hangne, hooid ngi kwah hynrei nga kwah ruh ba kan don ka jaka sah jahthait jong ka/u President ka Ri hangne, nga kwah ban ioh bun ki kad liengsuin, nga kwah bun ki medical college—ki jingkwah hi kim kut shuh”.
“Ngi hap ban peit ia kaei kaba lah ban pynurlong bad kumno ba ngim jam shakhmat, kaei kaban pynmyntoi ia ka thain bad iaid ha ka lynti kaba dei. Ngi hap ban khmih ia kine kiei kiei baroh. Ka dei ka jingai jingmut kaba biang eh bad ngin hap ban shong bishar ia ka” ula ong.
