Shillong, Iaiong 14: U Symbud Myntri Rangbah ka jylla Bah Prestone Tynsong, ula ong ba ka jylla ka dang don hapdeng ka jingduna ha ka jingdon ki pulit bad ka dang donkam kumba 3500-4000 ngut ki pulit ha ki kyrdan bapher bapher.
U Bah Prestone Tynsong ula kren ia kane hynne ka sngi, hadien bala wai ka jingialang bad ki heh pulit ka jylla kaba la tip kum ka SP/CO Conference kaba la long ha Police Headquarter, Shillong.
Haba iakren bad ki ladpathai khubor hadien bala wai ka jingialang, u Bah Prestone ula ong, ka jingialang kala iatai sani ia ki jingeh bad ki jingdonkam jong ki pulit ha ka jylla bad kawei na ki jingeh kadei ka jingduna haka jingdon jong ki pulit ha ka ban ai jingshakri ia ki paidbah khamtam ha kaban pynneh pynsah ia ka shongsuk shongshngain.
“Kawei na ki jingeh kaba ka tnad pulit ka mad kadei namar ka jingduna ha ka jingdon jong ki pulit bad ka donkam haduh 3500 haduh 4000 ngut ki pulit. Ka jingialang kala shim iaka rai ban ialeh ha ka ban pynsted iaka jingthep kam haka tnad pulit ha ki kyrdan ki bapher bapher khnang ba kin lah ban ai ka jingshakri bad ban pynneh iaka shongsuk shongsain” ong u Bah Prestone.
Ula ong, ba ka jingialang kala iatai ruh halor kiba bun ki jingdonkam ban pynkhlain iaka rukom treikam jong ki pulit naduh ka rukom pyntreikam iaka Forensic Science Lab ia kaba donkam ban buh shuh shuh ia ki tiar ki tar bad ia ki briew kiban pyniaid bad khmih ia katei ka Lab.
Nalor kane ula kdew ruh ia ka jingdonkam ban shna ia ki Police Outpost, Police Sattion, ki jaka sah jong ki heh pulit bad kiwei kiwei bad kila iatai sani iaka jingdonkam ban pynkhlain ruh iaka tnad Cyber Cell, ka jingpynbiang ia ki kali, ka jingpynbiang iaka jingdonkam jong ki pulit bad kiwei kiwei.
“Ngin ym lah ban shimkhia mardor ia kine ki jingeh baroh shi syn leh hynrei kum u Myntri Kam Pohiing ngan ialeh katba lah da kaba iaid da ka wat ne ‘Phase’ ban pynbiang ia kitei ki jingdonkam da kaba pynioh kham bun iaka bhah tyngka naka bynta ka tnad pulit” ong u Myntri Kam Pohiing.
Ha katei ka jingialang kaba la pyniaid hi da u Bah Prestone Tynsong la iadonlang u Director General of Police u Dr LR Bishnoi, ki heh pulit ka jylla naduh ki Superintendent of Police bad ki Commandant.
U Bah Prestone ula sam ruh ia ki syrnod sha ki heh pulit na ki District bapher jong ka jylla halor ka jingtrei shitom ka jongki ban tehlakam iaka jingkhaii be-aiñ ia u drok ha ka jylla.
