Nongstoiñ, Ïaïong 14: Namar ka jingbym biang ka um bam um dih ha ka shnong Nonglwai, ka Federation of Khasi Jaiñtia & Garo People Nonglwai Unit, ka la phah da ka jingthoh sha u Executive Engineer jong ka Public Health Engineering Western Circle Nongstoiñ ba un peit lem halor katei ka jingeh.
Ha u kyrwoh ba la pyllait da u samla Sanborisaw Secretary ka seng, la ong ba ka um bam um dih kaba dei ha katei ka shong, ka dei ka Nonglwai Nongkhlaw combine Water Supply scheme, kaba la ring lang na kawei ka top pynlang um kaba la shna ha Mawkaïang shuwa ba ka Jingïaseng Samla jong ka KJP Synod Sepngi kan long.
Naduh ka por ba katei ka jingïaseng bah kam pat long, ka um bam um dih ha baroh ar tylli ki shnong ka Nonglwai bad Nongkhlaw ka biang bha bad ka la pynsuk shibun ïa ki paitbah nong shong shnong. Hynrei, tang mar shu kut ka jingïaserng Synod Samla, ka um ruh ka la sangeh bad satang kumba shi pawa na ki longïing ha kitei ki ar tylli ki shnong kiba ka um ka dang poi bad wat la ka poi ruh kam thikna shuh.
Ki nongïalam ka seng ki la leit jurip ruh ïa ka laiñ ba la pyndait ïa ki pipe ban pynpoi um ha ka por ba long Jingïaseng Synod. La lap ba ka ophis PHE kam pat weng satia ïa ki lai tylli ki pipe line bad dei na katei ka daw ba ka um bam um dih kam biang shuh ha Nonglwai katkum ka jingdon kam jong ki longïing hapoh shnong.
Ha kajuh ka por ka seng ka kyntu ruh ïa ka ophis PHE ba na ka bynta ban pynbiang ïa ka um bam um dih, ka jingsam um ka dei ban long katkum ki pipe line kiba rim. La ong ruh ba naduh mynshuwa ka Nongkhlaw ka la don lypa saw tylli katba ka Nonglwai I ka Nonglwai II uwei, ka Mawkaïang uwei bad ka Myrshan Nongrim uwei katba ka Nongkhlaw pat ka don haduh hynñiew tylli ki pipe na ka juh ka skhim sam um.
Ka seng ka la kyntu jur ïa u EE ka PHE ba un phah peit bniah ïa ka rukom pynpoi um ha ki shnong ba kan long ryntih, khnang ba ka jingïoh ïa ka um bam um dih kan long kaba ryntih ha baroh ki thliew ïing hapoh kitei ki shnong.
